Z 30 studzienia va Uzbrojenych siłach Biełarusi pad kiraŭnictvam načalnika Hienieralnaha štaba VS — pieršaha namieśnika ministra abarony hienierał-majora Aleha Biełakonieva pravodzicca kompleksnaja pravierka ŭzroŭniu bajavoj hatoŭnaści. Aceńvać buduć elemienty bajavoj i zabieśpiačalnaj sistem Uzbrojenych sił.
Jak paviedamlaje pres-słužba Ministerstva abarony, asnoŭnyja zadačy pravierki: pavyšeńnie zładžanaści orhanaŭ vajennaha kiravańnia (štaboŭ), udaskanaleńnie zdolnaści kamandujučych, kamandziraŭ kiravać padnačalenymi vajskovymi častkami ŭ roznych umovach; kantrol zdolnaści vajskovych čaściej i padraździaleńniaŭ pryvieścisia ŭ hatoŭnaść da vykanańnia bajavych zadač va ŭstanoŭlenyja terminy.
U adpaviednaści z zadumaj da pravierki buduć pryciahnutyja vajskovyja čaści i padraździaleńni roznych rodaŭ vojskaŭ i śpiecyjalnych vojskaŭ. Praduhledžvajecca taksama pravierka sistemy supraćpavietranaj abarony palotami kantrolnych celaŭ.
«Mierapryjemstva płanavaje, choć i ŭtrymlivaje elemient raptoŭnaści dla pryciahnutych da pravierki. Dla ich budzie stvaracca dynamičnaje stanovišča, jakoje zapatrabuje nieardynarnych padychodaŭ da vyrašeńnia vučebna-bajavych zadač, detalovaha viedańnia ŭzbrajeńnia i vajennaj techniki, umieńnia chutka aryjentavacca va ŭmovach abmiežavanaści času i infarmacyi», — paviedamlaje Minabarony.
Tam adznačajuć, što mierapryjemstvy buduć prachodzić u składanych umovach zimy. Heta dazvolić na spravie pravieryć zdolnaść sistem techničnaha i tyłavoha zabieśpiačeńnia jakasna vykanać zadačy spraŭnaha funkcyjanavańnia ŭzbrajeńnia i vajennaj techniki i daviadzieńnia da vojskaŭ naležnych norm zabieśpiačeńnia.
Asablivaja ŭvaha budzie nadadzienaja pytańniam kantrolu za arhanizacyjaj biaśpieki vajennaj słužby.
Usiaho płanujecca pravieryć pryblizna 30 vajskovych čaściej i padraździaleńniaŭ. Z zapasu buduć pryzvanyja prykładna 3000 vajennaabaviazanych.
