U sud Centralnaha rajona Minska pastupili materyjały kryminalnaj spravy ŭ dačynieńni da Mikałaja Ryndziuka, hałoŭnaha treniera futbolnaha kłuba «Smarhoń», jaki vystupaje ŭ pieršaj lizie čempijanatu Biełarusi.
Ryndziuk abvinavačvajecca ŭ davańni chabaru ciapier užo byłomu dyrektaru departamienta sudziejstva i inśpiektavańnia asacyjacyi «Biełaruskaja fiederacyja futboła» Andreju Žukavu, paviedamiła pamočnik staršyni Minskaha haradskoha suda Anastasija Šylvian.
Žukaŭ, jaki źjaŭlaŭsia taksama staršynioj kamisii pa pryznačeńniach fiederacyi, 5 studzienia sudom Centralnaha rajona byŭ pryhavorany da piaci hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści i zabaronaj zajmać pasady, źviazanyja z vykanańniem arhanizacyjna-rasparadčych abaviazkaŭ, na piać hadoŭ. Na jaho taksama nakładzieny štraf u 500 bazavych vieličyń. Prysud Žukaŭ abskardziŭ.
Futbolnamu funkcyjanieru było vystaŭlenaje abvinavačańnie pa šaści epizodach atrymańnia chabaru (čč. 1 i 2 art. 430 KK) ad arbitraŭ i treniera «Smarhoni» ŭ siezonach 2014/2015 i 2015/2016 za pryznačeńnie na kankretnyja matčy vyšejšaj i pieršaj lih čempijanatu i Kubka Biełarusi pa futbole kankretnych sudździaŭ, a taksama ŭ pieravyšeńni ŭłady (č. 2 art. 426 KK). Vinu ŭ ździajśnieńni hetych złačynstvaŭ Žukaŭ pryznaŭ całkam, adnak ad davańnia pakazańniaŭ u sudzie admoviŭsia. Jon znachodzicca pad vartaj z 7 červienia 2016 hoda.
Ryndziuk, viadomy ŭ minułym biełaruski futbalist, pa spravie Žukava prachodziŭ śviedkam i daŭ pakazańni ŭ sudzie 3 listapada minułaha hoda.
Pavodle infarmacyi śledstva, mienavita paśla taho jak 7 červienia Ryndziuk pieradaŭ Žukavu ŭ jaho słužbovym kabiniecie ŭ pamiaškańni fiederacyi 100 jeŭra ŭ jakaści «padziaki», spartyŭny čynoŭnik byŭ zatrymany.
«Ni ŭ jakich apieratyŭnych mierapryjemstvach ja nie ŭdzielničaŭ, hrošaj pad kantrolem apieratyŭnikaŭ Žukavu nie pieradavaŭ», — zajaviŭ Ryndziuk u sudzie.
Jon raskazaŭ, što ŭ kancy maja 2016 hoda «Smarhoń» u pieršaj lizie pieraśledavała čarada niaŭdač i jak hałoŭny trenier jon byŭ nie zadavoleny sudziejstvam. Pakolki byŭ zapłanavany važny matč z homielskaj kamandaj, paprasiŭ Žukava pryznačyć na hetuju hulniu sudździoj svajho pryjaciela Andreja Saroku. Pry hetym sudździ, pavodle słoŭ Ryndziuka, «kamanda hulała bolš upeŭniena», akramia taho, jon maje vopyt sudziejstva matčaŭ vyšejšaj lihi. Žukaŭ, pavodle słoŭ Ryndziuka, ničoha nie abiacaŭ, ale skazaŭ, što dapamoža z pryznačeńniem Saroki, «kali budzie mahčymaść». U vyniku pryznačeńnie adbyłosia, «Smarhoń» vyjhrała matč, pretenzij da sudziejstva ni ŭ kaho nie było.
Praz tydzień Ryndziuk pryvioz u Minsk i pieradaŭ Žukavu ŭ jaho kabiniecie dźvie kupiury pa 50 jeŭra. Suma papiarednie była ŭzhodnienaja z Sarokam. U sudzie Ryndziuk padkreśliŭ, što hrošy Žukavu jon prynios z ułasnaj inicyjatyvy. Banknoty trenier pakłaŭ na stoł pierad spartyŭnym čynoŭnikam. Žukaŭ, pavodle słoŭ Ryndziuka, skazaŭ: «Kola, nie treba». Paśla pieradačy hrošaj byli zatrymanyja i Žukaŭ, i Ryndziuk. Zatym trenier «Smarhoni» napisaŭ zajavu ŭ milicyju ab davańni chabaru.
