Cieła zahinułaha biełarusa Vitala Mialika palicyja znajšła na zapraŭcy 3 lutaha, kala 11 hadzin viečara. Incydent adbyŭsia ŭ horadzie Norkas, štat Džordžyja. Palicyja šukaje padazravanych u ździajśnieńni złačynstva, paviedamlaje Tut.by.
Fota z sajta gofundme.com
Pavodle paviedamleńniaŭ miascovych ŚMI, u chodzie rasśledavańnia palicyja vyśvietliła, što Vital Mialik zajšoŭ u kramu na zapravačnaj stancyi. Zatym unutr uvajšli dvoje padazravanych, adzin ź jakich ździejśniŭ kuplu. Kali padazravanyja vyjšli na vulicu, pamiž imi i Mialikam zaviazałasia sprečka, jakaja pierarasła ŭ svarku. Adzin z padazravanych dastaŭ sa svajoj mašyny vintoŭku i zastreliŭ Mialika.
Jak adznačajuć u palicyi, cieła imihranta ź Biełarusi lažała na siaredzinie parkoŭki. Aŭtamabila pobač nie akazałasia. Detektyvy padazrajuć, što Mialik pryjechaŭ na zapraŭku razam sa svaimi zabojcami.
Zahinułamu było 33 hady. U Minsku ŭ Vitala zastałasia siamja — žonka Kaciaryna i dvoje dziaciej, małodšaj dačce ŭsiaho 4 miesiacy.
«Letam Vital pavinien byŭ atrymać hramadzianstva, i my z synam i dačkoj źbiralisia pierajechać da jaho», — raspaviała Kaciaryna.
Ciapier jana zajmajecca atrymańniem amierykanskaj vizy. Svajaki zahinułaha abviaścili na sajcie GoFundMe zbor srodkaŭ, kab žančyna mahła pajechać u Amieryku raźvitacca z mužam.