U Vietcy zatrymali arhanizavanuju hrupu palaŭničych-brakańjeraŭ, paviedamiła BIEŁTA śpiecyjalist pa suviaziach z hramadskaściu Dziaržaŭnaj inśpiekcyi achovy žyviolnaha i raślinnaha śvietu pry prezidencie Biełarusi Volha Hramovič.
«U Vietcy zatrymanyja palaŭničyja-nielehały, jakija daŭno byli na padazreńni ŭ pravaachoŭnikaŭ. Kab złavić hetuju arhanizavanuju hrupu z dokazami złačynstva, dziaržinśpiektary Homielskaj inśpiekcyi achovy žyviolnaha i raślinnaha śvietu pracavali razam z kalehami z Hałoŭnaha ŭpraŭleńnia pa baraćbie z arhzłačynnaściu i karupcyjaj i supracoŭnikami DAI. Parušalnikaŭ u roznych punktach čakali try ekipažy», — raspaviała Volha Hramovič.
Adzin z ekipažaŭ u 4 hadziny ranicy spyniŭ mašynu padazravanych na ŭjeździe ŭ horad. Pry ahladzie aŭtamabila, u jakim jechali troje hamialčan, dziaržaŭtainśpiektar vyjaviŭ strelbu i torbu ź miasam. «Kali parušalniki zrazumieli, što ŭładzić pytańnie nie atrymajecca, pierajšli da ahresiŭnych dziejańniaŭ. Adzin napaŭ na supracoŭnika DAI, jaho 19-hadovy syn schapiŭ zbroju i pasprabavaŭ uciačy. Debašyraŭ zatrymali ekipažy, jakija padaśpieli na dapamohu, ciapier brakańjery znachodziacca ŭ śledčym izalatary», — udakładniła Volha Hramovič.
U lasnym masivie kala darohi Vietka-Śviaciłavičy, adkul pryjechali parušalniki, dziaržinśpiektary Homielskaj MRI znajšli miesca zdabyčy kazuli — jaje miasa, chutčej za ŭsio, i pieravozili brakańjery. «Akramia hetaha, u domie zatrymanych znojdziena jašče kala 50 kh miasa, jak miarkujecca, łasia, a taksama frahmienty škury i rohi hetaj žyvioły. Akramia taho, u domie zachoŭvalisia try strelby — dźvie ź ich zarehistravanyja, prynaležnaść treciaj vyśviatlajecca. Raspačataja kryminalnaja sprava», — dadała Volha Hramovič.
