Tema Biełarusi nie sychodzić z ekranaŭ rasijskich telekanałaŭ. U čarhovy raz našaj krainie byŭ pryśviečany vypusk prahramy «Prava hołasu» na telekanale «TVCentr».
«Biełarusija: i nie siabar i nie vorah?» — tak nazyvałasia tok-šou. Papiarednija razy ŭ studyi adduvaŭsia adzin Aleh Hajdukievič, namieśnik staršyni ŁDPB. Ciapier ža ŭ Maskvie vysadziŭsia ceły desant. Na TVC paklikali Alaksandra Špakoŭskaha, Piatra Piatroŭskaha, Alaksieja Dziermanta i Vadzima Hihina — usie jany aŭtary prarasijskaha resursu «Imchakłab».
Jakuju pazicyju ahučvali hości ź Biełarusi? Ich ahulnaja dumka apielavała da dobraha cara-Pucina i drennych rasijskich aliharchaŭ, praź intaresy jakich psujucca adnosiny pamiž dźviuma krainami.
«U mianie adčuvańnie, što biełarusy jak na ekzamienie pavinny dakazvać, jak my lubim Rasiju. My raŭnapraŭnyja partniory. My — kraina, jakaja pieršaj, jašče ŭ žabrackija jelcynskija 1990-yja, zrabiła vybar na karyść Sajuznaj dziaržavy. I Alaksandr Łukašenka, i ŭsie, chto staić tut, adstojvajuć hety vybar Biełarusi. A vy pačali z nas, pierakinulisia na Ukrainu: čamu biez šapki, čamu biez valonkaŭ?» — aburyŭsia Vadzim Hihin. «My chočam, kab Rasija była mahutnaj vialikaj dziaržavaj, i ŭsio dla hetaha zrobim, — zapeŭniŭ jon adrazu ž. — Ale kali intaresy aliharchaŭ staviacca vyšej za nacyjanalnyja intaresy Rasii, my nie zaŭsiody [padtrymlivajem heta]».
«Viaducca pieramovy pra vizu Sajuznaj dziaržavy. Čamu ŭ hetaj situacyi adbyvajucca takija pravakacyjnyja rečy z boku FSB? — zadavaŭsia rytaryčnym pytańniem Piatro Piatroŭski, zhadvajučy źmieny na rasijska-biełaruskaj miažy. — Čamu Rasija zakryvajecca ad Biełarusi? A sapraŭdy, ci vyhadna rasijskim aliharcham reindustryjalizacyja Rasii? Nie. Bo tady stvarajucca vysokatechnałahičnyja pradpryjemstvy, ich kankurenty. Jany pavialičać svaju dolu ŭ rasijskaj ekanomicy. A tady, moža, rasijskaje kiraŭnictva padumaje, navošta nam hetyja aliharchi, jakija siadziać na šyi rasijskaha naroda, źjadajuć apošnija hrošy, kali realna patrebny technałahičny praryŭ». «Vaša [małočnaja] pradukcyja niekankurentazdolnaja!» — kryčaŭ Piatroŭski rasijskim ekśpiertam, pałova ź jakich, darečy, byli vychadcy ź Biełarusi.
«Hetyja ludzi da ŭłady nie majuć nijakaha dačynieńnia. Heta samazvancy, pravakatary, — kazaŭ Alaksiej Dziermant pra palitołahaŭ Arsienia Sivickaha i Juryja Caryka, aŭtaraŭ dakłada pra mahčymuju sprobu Rasii zabiaśpiečyć poŭny vajskova-palityčny kantrol nad Biełaruśsiu. — Ale takija samyja ludzi jość i ŭ Rasii. Na «Rehnumie» kuča ekśpiertaŭ, jakija ablivajuć brudam biełaruskuju movu. Hetyja pravakatary z dvuch bakoŭ pracujuć na rujnavańnie Sajuza, na našych supolnych vorahaŭ».
