Mahnus Karłsien.
Karłsien zhulaŭ za zbornuju Narviehii na Alimpijadzie i čempijanacie Jeŭropy ŭ 2015 hodzie i źbiraŭsia sioleta ŭpieršyniu ŭ historyi vystupić na suśvietnym pieršynstvie, piša RBK sa spasyłkaj na narviežskaje vydańnie Matt&Patt. Adnak praź źmienu terminaŭ čempijanatu, jaki projdzie ŭ Chanty-Mansijsku, vymušany byŭ admovicca ad hetych płanaŭ.
Pieršapačatkova płanavałasia pravieści čempijanat śvietu ŭ kancy maja, i hetyja terminy pasavali Karłsienu. Adnak spabornictva było pieraniesienaje na červień i supała pa terminach z turniram Grand Chess Tour, jaki projdzie ŭ Paryžy.
Mieniedžar Karślena paviedamiŭ, što najlepšyja šachmatysty śvietu vystupiać na Chess Grand Tour i Norway Chess (hety turnir taksama pa terminach supadzie z kamandnym čempijanatam śvietu). U vyniku mnohija zbornyja nie zmohuć vystavić samych mocnych šachmatystaŭ na suśvietnym pieršynstvie.
Prezident Narviežskaj šachmatnaj fiederacyi Morten Madsien zajaviŭ, što prasiŭ FIDE pieranieści čempijanat śvietu. «My jašče ŭ kastryčniku adpravili ŭ FIDE zapyt i paprasili pieranieści turnir. FIDE zajaviła, što pasprabuje niešta zrabić. Mnohija šachmatysty zaklučyli kantrakty na vystup na Norway Chess i Grand Chess Tour, situacyja Mahnusa nie ŭnikalnaja», — zajaviŭ Madsien.
Karłsien paćvierdziŭ tytuł čempijona śvietu pa kłasičnych šachmatach u śniežni minułaha hoda.
U matčy, jaki adbyŭsia ŭ Ńju-Jorku, jon vyjhraŭ u Karakina. Pieršyja siem partyj skončylisia ŭničyju, a vośmuju jon sastupiŭ Karakinu, hulajučy biełymi.
U dziasiataj partyi Karakin, hulajučy čornymi, sastupiŭ, i lik u matčy staŭ roŭnym. Dvanaccać partyj z kłasičnym kantrolem času skončylisia ŭničyju, a na taj-brejku pieramoh Karłsien.
Paśla hetaha Karłsien vystupiŭ na čempijanacie śvietu pa blic i chutkim šachmatach.
U turniry pa blicy Karłsien staŭ druhim, prapuściŭšy napierad Karakina. U chutkich šachmatach Karłsien staŭ trecim. Čempijonam śvietu staŭ ukrainiec Vasil Ivančuk, druhoje miesca zaniaŭ rasijanin Alaksandr Hryščuk. Karakin zastaŭsia 34-m.
