Čytačy «Našaj Nivy» z Kaściukovičaŭ dasłali ŭ redakcyju fota, zroblenyja ŭ horadzie 14 lutaha.
«Mo na cemientnym zavodzie złamalisia filtry dla vykidaŭ? Horad pasypaje voś takoj biełaj cemientnaj mukoj. Nie razumieju, čamu hetym musiać dychać maje dzieci», — napisaŭ čytač.
Jak zapeŭniŭ žurnalista «Našaj Nivy» dyrektar kaściukovickaha cemientnaha zavoda Ihar Łožačnikaŭ, nijakich fors-mažoraŭ na pradpryjemstvie nie zdarałasia.
«Filtry ŭ nas sučasnyja, ničoha takoha być nie moža. Vy pryjedźcie dla pravierki — u nas jość sistema kantrola, nas praviarajuć. Moža i byli asobnyja niuansy, paru mašyn absypała — nie viedaju. Ale heta nie katastrofa — u nas na zavodzie taksama mašyny absypaje. Byvajuć vypadki. U nas, u pryncypie, zavod pracuje, filtry pracujuć u štatnym režymie», — skazaŭ Łožačnikaŭ.
