U sacyjalnych sietkach nabiraje siłu zaklik pryjści 26 lutaha na centralnuju płošču Viciebska z patrabavańniem admianić dekret №3 ab «utrymancach».
Fota Siarhieja Hudzilina.
Abviestka źmieščanaja ŭ samaj bujnoj haradskoj supołcy Ukantakcie «Heta Viciebsk, dzietka». Supołka naličvaje bolš za 100 tysiač padpisčykaŭ.
«Viciebsk, 26 lutaha a 12 hadzinie źbirajemsia na centralnaj płoščy, padymicie svaju zadnicu, padumajcie, za jakuju budučyniu vy maŭčycie! Chopić adsiedžvacca doma! Razam my — siła!» — havorycca ŭ paviedamleńni.
Ahułam hety post sabraŭ bolš za 1,5 tysiačy łajkaŭ, a jašče 370 karystalnikaŭ padzialilisia dopisam.
Kamientaroŭ nabrałasia taksama bolš za paŭtysiačy. Zbolšaha ludzi nastrojenyja rašuča i hatovyja vychodzić na vulicu. Praŭda, niekalki kamientataraŭ zhadali, što ŭ hety dzień u Viciebsku majuć śviatkavać Maślenicu.
Taksama haračyja sprečki zajšli, ci prynosić ściahi. Tut ludzi padzialilisia. Adny kazali, što nieabchodnyja bieł-čyrvona-biełyja pałotniščy, inšyja miarkujuć, što nijakaj simvoliki być nie pavinna.
Kaardynatarka chryścijanskaj demakratyi pa Viciebsku Taćciana Sieviaryniec kaža, što maje namier padtrymać akcyju 26 lutaha.
«Padtrymajem, kaniečnie. Šmat pracy nami było praviedziena pa admienie dekretu №3. Ale raduje toje, što ludzi sami arhanizoŭvajucca», — raskazvaje nam Taćciana Sieviaryniec.
Jana kaža, što akcyju arhanizoŭvaje žančyna, jakaja nie ŭdzielničała raniej u apazicyjnych partyjach ci arhanizacyjach. «Heta zvyčajnaja žančyna, jakaja brała ŭdzieł u abaronie parka, kali tam chacieli pabudavać Safijski sabor».
Pry hetym Taćciana Sieviaryniec adznačaje, što ŭ Viciebsku šmat prarasijskich elemientaŭ, ale jana ŭpeŭnienaja, što im udasca nie dapuścić, kab mitynh pajšoŭ u prarasijskim rečyščy.
Palityk Mikałaj Statkievič nie ŭpeŭnieny ŭ efiektyŭnaści praviadzieńnia zaraz akcyj u rehijonach. «Treba vučycca na dośviedzie 2011 hoda, kali prachodzili maŭklivyja pratesty, — ličyć Statkievič. — Spačatku heta było vielmi dobra, fajna, ale paśla dajšło da poŭnaha vytuchańnia».
Statkievič pierakanany, što ŭ aŭtarytarnych krainach usio vyrašajecca ŭ stalicy, tamu zaklikaje ŭsich dałučycca da akcyi na 25 Sakavika. «Nie treba, kab enierhija sychodziła na minskija i miascovyja banhałory. Na Dzień Voli my pavinny pakazać našaj uładzie siłu, kab u centry Minska sabralisia dziesiatki tysiač čałaviek. Mahčyma, na nastupny dzień — 26 sakavika — spłanujem akcyi ŭ abłasnych centrach. Za apošnija paŭtara hoda nam atrymałasia adstajać terytoryju svabody ŭ centry Minska, važna, kab jana zastałasia», — miarkuje Statkievič.
Varta adznačyć, što akcyja 19 lutaha ŭ Viciebsku vyjšła nie samaj šmatlikaj, pryjšło niekalki dziasiatkaŭ čałaviek. Na hety raz čakajecca bolš.
