Apieratyŭnyja supracoŭniki kryminalnaha vyšuku Kastryčnickaha RAUS Hrodna pry padtrymcy kaleh z UUS Hrodzienskaha abłvykankama raskryli zhvałtavańnie, ździejśnienaje ŭ noč z 18 na 19 lutaha ŭ abłasnym centry.
Jak paviedamili va UUS, u milicyju pa telefonie źviarnułasia miascovaja žycharka 1980 hoda naradžeńnia. Žančyna raspaviała ab ździejśnienym u dačynieńni da jaje złačynstvie. Pa haračych śladach byŭ praviedzieny kompleks apieratyŭna-vyšukovych mierapryjemstvaŭ, pa vynikach jakoha ŭdałosia nie tolki vyśvietlić asobu padazravanaha, ale i zatrymać jaho. Mužčyna byŭ raniej sudzimy za zabojstva i zhvałtavańnie.
Pa infarmacyi načalnika kryminalnaha vyšuku Kastryčnickaha RAUS Uładzimira Vaŭčkieviča, žančyna paznajomiłasia z hvałtaŭnikom u internecie. Paśla 10 dzion pierapiski jany vyrašyli sustrecca. Pasiadzieli ŭ centry horada ŭ kafe, potym adpravilisia ŭ zabaŭlalnuju ŭstanovu. Pajšli hulać da Niomana. Tam novy znajomy napaŭ na žančynu, źniaŭ ź jaje załatyja łancužok i zavušnicy, udaryŭ niekalki razoŭ pa tvary, zhvałciŭ. Paŭtaryŭ heta paśla taho, jak vyjaviŭ u telefonie žančyny pierapisku ź inšymi mužčynami na tym ža sajcie.
«Złačyniec byŭ raźjušanym, i niejkim cudam paciarpiełaj udałosia astudzić jaho zapał. Kali razyšlisia, achviara tut ža źviarnułasia ŭ milicyju. Krychu paźniej vyjavili, što na resursie pa znajomstvach hvałtaŭnik prysutničaŭ z vydumanym imiem, čužoj fatahrafijaj i nie pakazaŭ svoj uzrost», — paviedamiŭ načalnik kryminalnaha vyšuku.
Jon taksama adznačyŭ, što pakul žančyna sustrakałasia z novym znajomym, doma ŭ jaje zastavalisia dvoje niepaŭnaletnich dziaciej, jakija nie viedali, kudy pajšła maci.
