U Sankt-Pieciarburhu paśla subotniaha kancertu pank-hurtu The Exploited, jaki prajšoŭ u kłubie «Kasmanaŭt», zahinuŭ adzin z naviedvalnikaŭ mierapryjemstva.
Jak stała viadoma žurnalistam, kala doma 15 na Branickaj vulicy zaviazałasia bojka, jakaja skončyłasia panažoŭščynaj, u vyniku čaho 27-hadovy biełarus Ihar B. atrymaŭ ranieńnie.
«Nieviadomy z paholenaj hałavoj u vysokich botach nanios nažom udar u žyvot 27-hadovamu mužčynu ŭ kramninnaj kurtcy i biejsbołcy», — kamientujuć situacyju śledčyja.
Rabotniki chutkaj dapamohi dyjahnastavali ŭ paciarpiełaha kołata-rezanuju ranu brušnoj paražniny. Adnak niahledziačy na akazanuju dapamohu, małady čałaviek pamior u mašynie miedykaŭ pry praviadzieńni reanimacyjnych mierapryjemstvaŭ.
Pa słovach Kaciaryny, siabroŭki zahinułaha, Ihar razam z tavaryšam stajaŭ paśla kancertu niedaloka ad kłuba, kali tam źjaviłasia kampanija maładzionaŭ, jak miarkujecca, ultrapravych pohladaŭ.
— Ihar paprasiŭ ich nie «zihavać», paśla čaho zaviazałasia bojka, i jon atrymaŭ nažom u žyvot, — raspaviała žurnalistam dziaŭčyna.
Vidavočcy śćviardžajuć, što paśla hetaha złačyniec źnik ź miesca zdareńnia. Zaraz jaho šukajuć pravaachoŭniki.
Cieła maładoha čałavieka pieraviazuć na jaho radzimu, u Mahiloŭ, dzie adbudziecca pachavańnie.
Na staroncy Ihara «Ukantakcie» paznačana, što jon vučyŭsia ŭ Minsku ŭ Aŭtamiechaničnym kaledžy.
