Fiederalnaje viedamstva pa abaronie Kanstytucyi Hiermanii (BfV) zajaviła ab roście ŭ krainie kolkaści patencyjnych isłamistaŭ-terarystaŭ, paviedamlaje Delfi sa spasyłkaj na Frankfurter Allgemeine.
«U ciapierašni čas my naličvajem 1,6 tys. čałaviek, jakija patencyjna zdolnyja ŭčynić terakt isłamisckaj nakiravanaści», — zajaviŭ u sieradu kiraŭnik viedamstva Chans-Hieorh Maasen na Jeŭrapiejskim palicejskim kanhresie ŭ Bierlinie. Jašče ŭ kancy 2016 hoda, pa jaho słovach, takich ludziej było nie bolš za 1,2 tys.
Maasen padkreśliŭ, što ŭ Hiermanii isnuje pastajannaja terarystyčnaja pahroza. «My pavinny pryznać, što žyviom nie ŭ narmalnym stanie, — zajaviŭ jon. — U ciapierašni čas pad pahrozaj nie tolki ZŠA — u pieršuju čarhu pad pahrozaj Zachodniaja Jeŭropa, uklučajučy Hiermaniju».
Asablivaja pahroza, kankretyzavaŭ kiraŭnik BfV, «zychodzić ad atradaŭ terarystaŭ, jakija pryjechali ŭ Hiermaniju dla ździajśnieńnia teraktaŭ. Padobnyja asoby mohuć pryjechać ź Siryi i mieć bajavy dośvied, a taksama viedy ŭ vyrabie vybuchovych pryład».
«Atrady terarystaŭ u stresavaj situacyi zdolnyja bolš prafiesijna abychodzicca z aŭtamatami Kałašnikava, čym bierlinskija palicyjanty — sa svajoj zbrojaj», — padkreśliŭ Maasen. Ale z 15 terarystyčnych napadaŭ u Jeŭropie ŭ apošnija dva hady tolki try byli praviedzienyja takimi atradami — astatnija, u tym liku piać teraktaŭ u Hiermanii letaś, ažyćciavili asobnyja złačyncy abo nievialikija hrupy z asobnych złačyncaŭ, skazaŭ Maasen.
