6 sakavika ŭ sudzie Małaryckaha rajona pačaŭsia sud pa abvinavačańni byłoha pamočnika prakurora Bresta Alaksandra Vierchavoha ŭ niezakonnym abarocie psichatropaŭ. Małady čałaviek abvinavačvajecca ŭ tym, što kupiŭ u internet-narkašopie asabliva niebiaśpiečnaje psichatropnaje rečyva, a zatym pasprabavaŭ pradać častku tavaru svajoj znajomaj za 30 rubloŭ.
Pavodle viersii abvinavačańnia, 2 śniežnia minułaha hoda 28-hadovy Alaksandr Vierchavoj praz dadatak Telegram źviazaŭsia ź internet-narkašopam i zamoviŭ psichatrop. Skrutak z rečyvam raślinnaha pachodžańnia, jakoje źmiaščaje asabliva niebiaśpiečnaje psichatropnaje rečyva, jon zabraŭ z zakładki za rekłamnym ščytom na vulicy Maskoŭskaj u Breście — niedaloka ad budynka haradskoj prakuratury. Spajs abvinavačvany advioz dadomu ŭ ahraharadok, 3 śniežnia na praśpiekcie Mašerava kala CUMa jon pradaŭ častku «skrutka» svajoj znajomaj.
Na «miefie» i «śpidach»
Alaksandr Vierchavoj žanaty, baćka dvaich niepaŭnaletnich dziaciej: čatyroch i piaci hadoŭ. Žyvie ŭ Bresckim rajonie. U sudzie jon paviedamiŭ, što da zatrymańnia jon «nie pracavaŭ». Adnak z abvieščanych padčas pasiadžeńnia materyjałaŭ spravy, vyśvietliłasia, što raniej jon zajmaŭ pasadu pamočnika prakurora Bresta. Bolš za toje byŭ znajomy z supracoŭnikami narkakantrolu, bo padtrymlivaŭ abvinavačańni ŭ tym liku i pa spravach za niezakonny abarot narkotykaŭ.
Zatrymańnie Alaksandra Vierchavoha stała vynikam śpiecapieracyi apieratyŭnikaŭ. Pačałosia ŭsio 30 listapada, kali ŭ Maskoŭski RAUS Bresta dastavili 28-hadovuju Nadzieju, zatrymanuju za zachoŭvańnie psichatropaŭ. U rajadździele jaje paprasili nazvać usich ludziej, u jakich jana kali-niebudź kuplała zabaronienyja rečyvy. Jana nazvała Alaksandra Vierchavoha, ź jakim znajomaja praz byłoha muža.
«U nas ź Vierchavym skłalisia davierlivyja adnosiny, — paviedamiła Nadzieja na dopytach u jakaści śviedki pa spravie Vierchavoha, — jon raskazvaŭ, što ŭžyvaŭ narkotyki jašče sa škoły. (…) Taksama mnie viadoma, što Vierchavoj užyvaŭ «MIEF» (słenhavaja nazva narkotyku miefiedron). Paznajomiłasia ja ź Vierchavym u krasaviku 2014 hoda. Jon raspavioŭ mnie i majmu mužu, što pajedzie na fiestyval u Minsk. U suviazi z hetym moj muž skazaŭ jamu, što jość mahčymaść pasprabavać i kupić «mief». Jon skazaŭ, što heta kruta, i, pa-mojmu, paśla hetaha nabyŭ u majho muža hetaje rečyva, ale ja ŭ heta nie ŭnikała. (…) Ja viedała, što Vierchavoj staŭ užyvać «mief». Hetaje rečyva jon ŭžyvaŭ da listapada 2014 hoda. U hety čas mahčymaść nabyć «mief» u Breście źnikła. Z 2015 hoda źjavilisia internet-kramy, i Vierchavoj pačaŭ nabyvać «chutkaść» (taksama viadomyja jak «śpid» — amfietamin) praź internet-kramy. Heta mnie viadoma ź jaho słovaŭ».
Nadzieja vyrašyła supracoŭničać z narkapalicyjaj. Matyvy hetaha ŭčynku da kanca nie vyznačany. U adnych dopytach jana śćviardžała, što zrabiła heta ŭ nadziei na źmiakčeńnie pakarańnia pa svaim artykule — za zachoŭvańnie psichatropaŭ, u sudzie i zusim adznačyła, što vyrašyła supracoŭničać, kab milicyjanty «nie raspaviali mamie i baćku pra toje, što niuchała narkotyki».
«Jon skazaŭ, što choča pradać «kuryva»»
Užo na nastupny dzień paśla zatrymańnia, 1 śniežnia, Nadziei na Viber patelefanavaŭ abvinavačvany.
— Skazaŭ, kab ja vyjšła na vulicu pakuryć. Ja była ździŭlenaja, nie čakała hetaha vizitu i dumała, što ŭ hetym jość niejki padvoch, bo zdavałasia ŭčora ja była zatrymanaja za zachoŭvańnie narkotykaŭ, — paviedamiła na dopycie Nadzieja.
Dziaŭčyna vyjšła na vulicu pahavaryć z Alaksandram.
— Jon paprasiŭ, ci jość u mianie što-niebudź, majučy na ŭvazie «chutkaść». Ja adkazała, što nie. Jon prapanavaŭ mnie zaŭtra, heta značyć 2 śniežnia 2016 hoda, što-niebudź zamucić, - začytali ŭ sudzie pakazańni śviedki.
Z pakazańniaŭ Nadziei vynikaje, što narkašop vinien byŭ Alaksandru 0,3 hrama «chutkaści». U toj ža viečar jana paviedamiła pra ŭsio apieratyŭnamu supracoŭniku narkakantrolu. Z hetaha momantu apieracyja prachodziła pad ich kantrolem.
Nadzieja i abvinavačvany razmaŭlali praz telefonny miesiendžar. Usie paviedamleńni čytali bresckija apieratyŭniki. Ź pierapiski vyśvietliłasia, što narkašop jaho «kinuŭ» i zamiest «chutkaści» ŭ zakładku pakłali «kuryva» — kurylny psichatrop. Pry hetym administracyja narkašopa pryznała pamyłku i paabiacała ŭ budučyni biaspłatna zrabić novuju zakładku sa «chutkaściu».
— U pracesie pierapiski jon skazaŭ, što choča pradać «kuryva», na što ja prapanavała jamu kupić jaho častku. Jon pahadziŭsia i pieršapačatkova chacieŭ pryvieźci mnie častku ŭ toj ža viečar, ale potym my heta ŭsio pieranieśli na subotu (3 śniežnia) pa inicyjatyvie Vierchavoha, - raspaviała na dopycie Nadzieja.
Apieratyŭniki pieradali Nadziei dyktafon i try kupiury pa 10 rubloŭ ź pierapisanymi numarami.
Nadzieja sustrełasia ź Vierchavym za blinnaj kala CUMa. Dziaŭčyna ŭ toj dzień pracavała i vyjšła na «pierakur», kali abvinavačvany padjechaŭ:
— Jon adrazu pieradaŭ mnie pačak cyharet i ja zrazumieła, što ŭ pačku ad cyharet lažyć hašyš, jaki jon napiaredadni prapanoŭvaŭ mnie kupić. Ja pakłała pačak cyharet u kišeniu i addała jamu hrošy, jakija mnie vydali supracoŭniki milicyi, - patłumačyła Nadzieja.
Kali maładyja ludzi raźvitalisia, Nadzieja nadzieła akulary — heta było ŭmoŭnym sihnałam ab tym, što ździełka adbyłasia i supracoŭniki narkakantrolu zatrymali Vierchavoha. Pry vobšuku ŭ jaho, u pryvatnaści, vyjavili tyja samyja try kupiury pa 10 rubloŭ. Vierchavoj adrazu zajaviŭ, što pry sabie ŭ jaho zabaronienych rečyvaŭ niama, ale jość doma. Padčas pieratrusu apieratyŭniki znajšli palimierny pakiet z rečyvam raślinnaha pachodžańnia, jaki toj zabraŭ z zakładki.
Da 15 hadoŭ pazbaŭleńnia voli
Alaksandra Vierchavoha abvinavačvajuć u niezakonnym z metaj zbytu nabyćci, zachoŭvańni, pieravozcy i niezakonnym zbycie asabliva niebiaśpiečnaha psichatropnaha rečyva (č.3 art. 328 KK). Maksimalnaje pakarańnie — piatnaccać hadoŭ pazbaŭleńnia voli z kanfiskacyjaj majomaści.
Abvinavačvany pryznaŭ svaju vinu tolki ŭ zachoŭvańni psichatropnaha rečyva. U dačynieńni da epizodu sa zbytam na pieršym pasiadžeńni jon admoviŭsia vykazvacca.
Nastupnaje sudovaje pasiedžańnie pryznačanaje na 13 sakavika.
