Sud Frunzienskaha rajona Minska pryhavaryŭ byłoha hałoŭnaha inžyniera AAT «Minski zavod kołavych ciahačoŭ» da vaśmi hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu.
U jaho kanfiskujuć majomaść i pazbaviać prava zajmać pasady, źviazanyja z vykanańniem arhanizacyjna-rasparadčych, administracyjna-haspadarčych abaviazkaŭ, terminam na piać hadoŭ. Prakuror padčas sudovych sprečak prasiŭ hałoŭnamu fihurantu pryznačyć pakarańnie ŭ vyhladzie dziesiaci hadoŭ pazbaŭleńnia voli z adbyvańniem pakarańnia ŭ kałonii ŭzmocnienaha režymu.
Pa spravie taksama prachodziać načalnik kanstruktarskaha biuro i namieśnik načalnika instrumientalna-štampavaha ŭpraŭleńnia pa vytvorčaści. Pieršy asudžany na čatyry hady pazbaŭleńnia voli z adbyvańniem pakarańnia ŭ kałonii ŭzmocnienaha režymu, z kanfiskacyjaj majomaści. Druhi pryhavorany da troch hadoŭ abmiežavańnia voli biez nakiravańnia ŭ vypraŭlenčuju ŭstanovu adkrytaha typu. Abodvuch pazbaviać prava zajmać pasady, źviazanyja z vykanańniem arhanizacyjna-rasparadčych abaviazkaŭ, terminam na piać hadoŭ. Padčas sudovych sprečak prakuror prasiŭ dla ich anałahičnaje pakarańnie.
Byłyja słužbovyja asoby MZKC abvinavačvajucca ŭ ździajśnieńni złačynstvaŭ karupcyjnaj nakiravanaści. Padčas śledstva ŭstanoŭlena, što ŭ 2011-2015 hadach hałoŭny inžynier, načalnik kanstruktarskaha biuro i namieśnik načalnika instrumientalna-štampavaha ŭpraŭleńnia pa vytvorčaści, vyklučna ŭ suviazi z zajmajemym imi słužbovym stanoviščam, atrymlivali ad pradstaŭnikoŭ subjekta haspadarańnia ŭ jakaści chabaru hrašovyja srodki za sadziejničańnie ŭ ažyćciaŭleńni pastavak na zavod režučaha i dapamožnaha instrumienta.
Usiaho śledstvam ustanoŭlena 80 epizodaŭ atrymańnia chabaru abvinavačanymi. Hałoŭnamu inžynieru inkryminujecca atrymańnie bolš jak Br180 tys., načalniku kanstruktarskaha biuro - Br14,6 tys. Namieśnik načalnika instrumientalna-štampavaha ŭpraŭleńnia pa vytvorčaści abvinavačvajecca ŭ atrymańni chabaru ŭ pamiery $1 tys.
