Źniavaha pomnika abo inšaha symbaličnaha miesca — tak polskaja palicyja kvalifikavała dzieńni 11 čałaviek zatrymanych apoŭdni ŭ piatnicu kala bramy «Arbeit macht frei» u Aśviencimie. Siarod zatrymanych — čaćviora hramadzianaŭ Biełarusi.
Za hetkaje parušeńnie pahražaje štraf abo abmiežavańnie svabody, paviedamlaje wyborcza.pl.
Palicyja, adnak, nie vyklučaje mahčymaści inšych punktaŭ abvinavačańnia. Pra heta budzie paviedamlena paśla zboru ŭsich faktaŭ, skazała pradstaŭnica palicyi ŭ Aśviencimie Małhažata Jurecka.
Pavodle infarmacyi muzeju, kala 14.00 pavodle miascovaha času hrupa asobaŭ kala hałoŭnaj bramy kanclahieru Aśviencim zabiła jahnia i raździełasia dahała. Na parkinhu pierad uvachodam u muzej była ŭzarvanaja rakieta.
Jahnia było pryniesienaje ŭ zaplečniku, jaho zabili pierad bramaj, što było zafiksavana na kamery sačeńnia Aśviencimskaha muzeju. Paśla hetaha ŭsie adzinaccać parušalnikaŭ raździelisia dahała.
— Jany mieli z saboj kajdanki, ale nie paśpieli imi skavacca. Jany taksama prynieśli z saboj biełaje pałatno z nadpisam «love», — paviedamiŭ pradstaŭnik małapolskaj palicyi Sebastyjan Hleń.
Supracoŭnik muzeju Bartaš Bartyzel paviedamiŭ, što adrazu paśla pačatku incydentu ŭ jaho ŭmiašałasia muzejnaja achova. Terytoryja była zakrytaja dla naviednikaŭ, na miesca zdareńnia vyklikali palicyju.
Palicyja paviedamlaje pra zatrymańnie 11 čałaviek: 6 palakaŭ, 4 biełarusaŭ i 1 niemca (7 mužčyn i 4 žančyny) ad 20 da 27 hadoŭ. Pavodle mas-medyjaŭ, hetak jany źbiralisia pratestavać suprać vajny va Ŭkrainie.
Palicyja vyśviatlaje, ci niechta dapamoh im pranieści na terytoryju muzejnaha kompleksu zaplečnik ź jahniom i kajdankami.
Muzej u svajoj zajavie padkreśliŭ, što vykarystańnie symboliki Aśviencimu dla jakich by to ni było demanstracyjaŭ abo chepeninhaŭ — aburalnaje i vartaje pakarańnia. Heta abražaje pamiać achviaraŭ niamieckaha kanclahieru.
