Pa hučnaj spravie ab padrychtoŭcy da masavych biesparadkaŭ u Miensku (tak zvanaja sprava «Biełaha lehijonu») było zatrymana 26 čałaviek. Ale aficyjnaje abvinavačańnie aryštavanym nia vyniesienaje, skazaŭ Svabodzie načalnik upravy suviaziaŭ z hramadzkaściu KDB Dźmitry Pabiaržyn. Pavodle jahonych słoŭ, dla vyśviatleńnia ŭsich pytańniaŭ jość praduhledžany zakonam čas:
«Jašče čas jość, da 31 sakavika. Siońnia-zaŭtra my planujem dać bolš razhornutuju infarmacyju. Davajcie pačakajem, pakul usio sfarmujuć. Miarkuju, buduć dadzienyja adkazy na ŭsie pytańni», — skazaŭ Dźmitry Pabiaržyn.
Pradstaŭnik KDB nie ŭdakładniŭ kolkaść aryštavanych fihurantaŭ spravy «Biełaha lehijonu» i taksama zaklikaŭ pačakać.
U śpisie achviaraŭ pieraśledu za akcyi pratestu, źmieščanym na sajcie pravaabarončaha centru «Viasna», jość i asobny śpis zatrymanych u spravie «Biełaha lehijonu».
Hety śpis na prośbu «Svabody» skarektavała i prakamentavała staršynia rady «Baćkaŭščyny» Nina Šydłoŭskaja, byłaja žonka zatrymanaha eks-«lehijanera» Mirasłava Łazoŭskaha.
Pavodle Niny Šydłoŭskaj, u śpisie mierkavana 26 čałaviek. Heta zatrymanyja 21 sakavika Aleś Jaŭdacha, Mirasłaŭ Łazoŭski, Andrej Dundukoŭ, Illa Hrek, Viačasłaŭ Dukšt, Alaksiej Abramaŭ, Jan Michalkoŭ, Andrej Komlik-Jamacin, Siarhiej Barstok, Cimur Paškievič, Maksim Ściapanaŭ, Uładzimier Rumiancaŭ, Viktar Daniłaŭ i Dźmitry Novik. Da śpisu varta dałučyć i kiraŭnika vajskova-patryjatyčnaha klubu «Patryjot» u Babrujsku Mikałaja Michalkova. Pavodle Niny Šydłoŭskaj, paśla dopytu ŭ Babrujsku Mikałaja Michalkova adpuścili, ale paźniej pa jaho pryjechali ź Miensku, i ciapier jon znoŭ zatrymany. Trymajuć Mikałaja Michalkova ŭ SIZA KDB u Miensku.
Tam ža, mierkavana, znachodzicca i Jaŭhien Pałtaržycki, jaki raskazvaŭ dla BT pra schron armatury, nibyta zakładzieny «lehijanerami».
Jašče 8 čałaviek byli zatrymanyja ciaham dvuch dzion paźniej. Heta maładafrontaŭcy Arciom Leŭčanka, Źmicier Daškievič, Siarhiej Palčeŭski, Siarhiej Strybulski, Raman Vasiljeŭ, Źmicier Kramianiecki, Uładź Jaromienak, a taksama Ivan Kavalčuk i Jury Huryn.
Novy aryštavany pa spravie «Biełaha lehijonu»
Apošnim «śpis Niny Šydłoŭskaj» papoŭniŭ Andrej Bialaŭski. «Heta były «lehijaner», voś źjavilisia źviestki, što jon taksama zatrymany», — skazała Svabodzie 28 sakavika Nina Šydłoŭskaja.
Niaviesta Mirasłava Łazoŭskaha Śviatłana kaža, što byłych udzielnikaŭ «Biełaha lehijonu» trymajuć u SIZA KDB:
«Tak, jon u «amerykancy». Skazali, što jon aryštavany, ale abvinavačańnie jamu jašče nia vystavili, što mohuć trymać ciaham 10 dzion. Zatrymali 22-ha, značyć, maŭlaŭ, jašče jość čas. U jaho byŭ advakat, pieradaŭ, što adčuvaje siabie nibyta dobra. Skarhaŭ nibyta asablivych niama. Kali atrymajecca, zaŭtra budzie sustreča z advakatam znoŭ. Zvarotnaj suviazi ź im pakul niama, skazali, što ŭ nastupnuju pieradaču možna budzie ŭkłaści kanverty, kab jon moh adpravić listy», — skazała Śviatłana.
Advakataŭ vyklikajuć u «amerykanku» na 29 sakavika
Žonka aryštavanaha Alaksieja Abramava Maryja skazała Svabodzie, što advakata jaje muža taksama vyklikajuć u KDB dla śledčych dziejańniaŭ na sieradu, 29 sakavika. Muž Maryi Alaksiej, pavodle jaje słoŭ, taksama ŭ statusie aryštavanaha, ale abvinavačańnie jamu jašče nia vystaŭlena.
Maładafrontaŭcaŭ, zatrymanych paśla taho, jak aryštavali byłych «lehijaneraŭ», trymajuć nie ŭ SIZA KDB, a na «Vaładarcy». Maci Siarhieja Palčeŭskaha Lidzija skazała Svabodzie:
«Advakat kaža, što bačyłasia z synam, što nibyta ŭmovy ŭ jaho narmalnyja, nia skardzicca. Ale jak tam nasamreč, nia viedaju. Nijakaj infarmacyi pra spravu jašče niama. Adnak budziem spadziavacca, što vyzvalać».
Siarod inšych maładafrontaŭcaŭ na «Vaładarcy» trymajuć i sustaršyniu arhanizacyi Źmitra Daškieviča.
«Listoŭ i zvankoŭ ad jaho pakul niama. Siońnia budu havaryć z advakatam, moža źjavicca niejkaja infarmacyja», — skazała žonka palityka Nasta Daškievič.