27 sakavika ŭ Saŭt-Ryviery pamior Vital Ciarpicki. Jon pražyŭ 94 hady.
Vital Ciarpicki naradziŭsia 3 lutaha 1923 h. u Iviancy ŭ siamji śviatara. Vučyŭsia ŭ nastaŭnickaj sieminaryi ŭ Navahrudku, u červieni — u aficerskaj škole BKA, ź jakoj uletku 1944 h. apynuŭsia na emihracyi. Los napačatku zakinuŭ va ŭschodniuju Francyju. Tam ź siabrami ŭciok da francuzskich partyzan, a potym u Italii vajavaŭ z hitleraŭcami ŭ składzie brytanskaj Armii Andersa.
Pa demabilizacyi pryjechaŭ u Brytaniju, pražyŭ tam čatyry hady, ale pačuŭšy, što ŭ amierykanskim Saŭt-Ryviery arhanizujecca biełaruskaje žyćcio, pierabraŭsia z žonkaj za akijan.
«Naprykancy listapada 1951 hoda ja z žonkaj Ženiaj pryjechaŭ u Saŭt-Ryvier. Tut užo isnavała pieršaja biełaruskaja carkva, jakaja miaściłasia ŭ nievialikaj zalcy. Carkva była ŭpryhožana ikonami j carkoŭnymi rečami, jakija a. Łapicki pryvioz ź Niamieččyny. Voś tut ja ŭpieršyniu paznajomiŭsia z a. Mikałajem, pra jaho šmat čuŭ i čytaŭ. Ź pieršaj sustrečy zaviazałasia ŭ nas ciopłaja pryjazń, a ź joj bieźlič płanaŭ na budučyniu. Maja žonka spatkała ŭ carkvie šmat svaich znajomych z łahiera Vatenštet u Niamieččynie, uklučna ź jaho byłym kamiendantam Śviatasłavam Kaŭšom. Carkoŭny starasta Chviedar Vysocki, čałaviek pa charaktary dynamičny j naporysty, uciahnuŭ mianie z arhanizacyjny kamitet, jaki mieŭ zaniacca spravami pabudovy novaj carkvy i zały», pisaŭ jon.
Hałoŭnym svaim dasiahnieńniem na emihracyi Ciarpicki ličyŭ dziejnaść ŭ biełaruskim prychodzie. U siaredzinie 1960-ch jon uznačaliŭ budaŭničy kamitet pa ŭźviadzieńni novaj carkvy. I mienavita šmat u čym dziakujučy jamu i paplečnikam hetaja carkva była zbudavana i azdoblena ŭłasnymi rukami. Budavali biełarusy jaje piać hadoŭ.
Ciarpicki navat vydaŭ knihu «Historyja pabudovy carkvy ŭ Saŭt-Ryviery», dzie padrabiazna apisaŭ padziei 1950—1975 hh. i pieraličyŭ usich, chto achviaravaŭ hrošy na carkvu.
Pachavajuć Vitala Ciarpickaha ŭ subotu na biełaruskich mohiłkach u Saŭt-Ryviery.
