Paśla brutalnaha razhonu śviatkavańnia Dnia Voli 2017 u Minsku pa internecie paleźli čutki, što ludzi ŭ zialonaj formie — heta rasijski śpiecnaz.
Paśla takaja dumka aformiłasia ŭ navinu na sajcie «Mahiloŭskaha rehijona», adkul pačała padarožža pa sacyjalnych sietkach.
«Naša Niva» razabrałasia, ci jość padstavy kazać pra «rasijski śpiecnaz».
Raźbiarem papunktava.
Šlemy na rasijskim vajskoŭcu i biełaruskim śpiecnazaŭcy, jakija aŭtar nazyvaje «adnolkavymi» i jakija pryvodziacca ŭ jakaści dokazu prysutnaści rasijan na Dni Voli, nasamreč nie adnolkavyja — na ich naniesieny rozny kamuflaž, roznaje abarončaje škło.
Rasijski vajskoviec (źleva) i biełaruski śpiecnazaviec. «Kasatka» na hrudziach — heta najchutčej pazyŭny ci mianuška ŭ rocie, a nie datyčnaść da murmanskaha śpiecnaza FBS «Kasatka», jak śćviardžajecca ŭ artykule. Adnolkavy typ bałakłavy taksama ni pra što nie kaža — «zialonyja» śpiecnazaŭcy byli ŭ absalutna roznych.
Forma «Horka» taksama vykarystoŭvajecca ŭ Biełarusi — nasupierak śćviardžeńniu ŭ artykule.
Roznyja varyjacyi «Horki» nosiać u biełaruskim śpiecnazie, hetak ža, jak i umoŭny «Mulcikam» i «Akupat», jakija bolš ułaścivyja nataŭskim armijam.
Bolš za toje, za čałaviekam u «Horcy» stajać chłopcy ŭ statutnaj formie Unutranych vojskaŭ Biełarusi — kankretna ŭ Minsku tak apranutyja słužboŭcy v/č 3214 i 3310.
Nie sakret, što aficery i kantraktniki časam ličać za lepšaje admovicca ad statutnaj dla terminovych žaŭnieraŭ formy i samastojna kupić inšuju — bolš zručnuju kankretnamu čałavieku. Heta zvyčajnaja praktyka dla siłavikoŭ.
Padobnuju dumku vykazaŭ «Našaj Nivie» i vajskovy ekśpiert Alaksandr Alesin.
«U našych krainach isnujuć mižviedamasnyja kalehii MUS, KDB i FSB. Tam pryniatyja adnolkavyja standarty abmundziravańnia, i heta datyčyć nie tolki Unutranych vojskaŭ — z Rasijaj u nas adnolkavaja strałkovaja zbroja, adnolkavaja vajskovaja technika. Tamu, kali vy ŭbačycie sałdata z aŭtamatam Kałašnikava ŭ Biełarusi, vy ž nie padumajecie, što heta rasijanin? — kaža Alesin. — Nu i kali dapuścić, što tut chtości pryjechaŭ z Kyrhyzstana, Hiermanii ci Rasii, kab panazirać za rabotaj tutejšaha śpiecnaza dla abmiena dośviedam, to naŭrad ci b jany afišavali tut svaju prysutnaść — stajali b sabie ŭ cyvilnaj ci spartovaj formie. Tamu ja aceńvaju čutki pra prysutnaść ruskich jak fejk, zapuščany z raźlikam na nieabaznanych u temie ludziej».
Pres-sakratar minskaj milicyi Alaksandr Łastoŭski skazaŭ «Našaj Nivie», što kamientavać usurjoz hetyja čutki było b duraściu i lićciom vady na młyn tych, chto ich zapuskaje.
Jašče adna krynica z Unutranych vojskaŭ nazvała čutki pra «śpiecnaz FSB» łuchtoj.
Analityk Andrej Parotnikaŭ skazaŭ nam, što arhumientacyja realnaści rasijskaha śpiecnaza ŭ Minsku vartaja śmiechu, bo ŭsie zhadanyja elemienty ekipiroŭki vykarystoŭvajucca ŭ Biełarusi.
Pa fota, jakija jość u internecie, možna zrabić vysnovy, što ŭ razhonie akcyi ŭdzielničali adnačasova milicyja, AMAP i śpiecnaz Unutranych vojskaŭ.
