Supracoŭniki archivu ŭ paŭdniovačešskim horadzie Indržychuŭ Hradec na zapyt biełaruskich historykaŭ znajšli ŭ svaim schoviščy dva rukapisnyja dakumienty, datavanyja 1584 i 1590 hadami. Abodva dakumienty ŭłasnaručna padpisanyja synam Franciška Skaryny Symonam Rusam z Połacka.
Dva tydni tamu supracoŭnik Instytuta historyi Akademii navuk Biełarusi Aleś Žłutka i biełaruski historyk z Karłavaha ŭniviersiteta ŭ Prazie Pavieł Kotaŭ zrabili zapyt u archiŭ horada Indržychuŭ Hradec z prośbaj adšukać dakumienty, datyčnyja syna Franciška Skaryny Symona.
Pra hetyja dakumienty raniej było viadoma, što jany isnujuć, pra ich zhadvałasia ŭ adnoj z publikacyj 1929 hoda, ale sami jany i ich tekst u navukovy abarot nie ŭvodzilisia.
10 krasavika Pavieł Kotaŭ atrymaŭ z archivu kopii abodvuch dakumientaŭ.
Heta dva aryhinalnyja rukapisy, padpisanyja rukoj Symona Rusa z Połacka. Mova ŭ dakumientach idzie pra drennaje zdaroŭje Symona i adpraŭku jaho panam Adamam z Hradca na kurort Dobra Voda.
Archiŭ horadu Indržychuŭ Hradec, jaki źjaŭlajecca filijałam Hałoŭnaha abłasnoha archivu ŭ horadzie Tršebań, daŭ dazvoł na publikacyju abodvuch dakumientaŭ. Jany buduć uklučanyja ŭ zbornik dakumientaŭ pra žyćcio i dziejnaść Franciška Skaryny, abnoŭlenaje vydańnie jakoha ciapier rychtujecca ŭ Nacyjanalnaj akademii navuk Biełarusi.
