Kiraŭnik Raśsielhasnahladu Siarhiej Dankviert ličyć, što ŭ Rasii pavinny raspačać kryminalnuju spravu suprać Minsielhascharča Biełarusi za ŭchileńnie ad supracoŭnictva z Raśsielhasnahladam pa vyjaŭleńni sankcyjnych praduktaŭ na miežach krainy ź ES i RF. Takoje mierkavańnie Dankviert vykazaŭ u intervju RNS, piša Tut.by.
vgnki.ru
U Biełarusi ŭ dačynieńni da Dankvierta idzie pravierka paśla zajavy Alaksandra Łukašenki ab nieabchodnaści raspačać kryminalnuju spravu z-za abmiežavańni dostupu na rasijski rynak pradukcyi biełaruskich pradpryjemstvaŭ.
Na dumku Dankvierta, vieterynarnyja i fitasanitarnyja słužby Rasii i Biełarusi pavinny prymać miery pry vyjaŭleńni sankcyjnaj pradukcyi.
«Kali jość jakija-niebudź pytańni, my havorym: davajcie vystavim sumiesnyja pasty na źniešniaj miažy Biełarusi i ES i pahladzim, jak vy prapuskajecie tavary. Ale na heta atrymlivajem admovu», — zajaviŭ jon. Dankviert ličyć, što admova Minsielhascharča źjaŭlajecca ŭskosnym pakazčykam zacikaŭlenaści Ministerstva sielskaj haspadarki i charčavańnia Biełarusi.
«Kažučy movaj toj kryminalnaj spravy, jakuju mohuć zavieści suprać mianie, jany paturajuć praniknieńniu sankcyjnych praduktaŭ u Rasiju. Tamu kryminalnaja sprava, jakaja z našaha boku pavinna być raspačataja, pavinna być raspačata suprać usiaho Ministerstva sielskaj haspadarki Biełarusi ŭ kantekście ŭchileńnia ad sumiesnaj z nami pracy, tamu što dziejańniaŭ, sumiesnych z nami, ni na źniešniaj miažy, ni na miažy z Rasijaj nie było. A sankcyjnaja pradukcyja nami zatrymlivajecca», — zajaviŭ Dankviert.
Kiraŭnik Raśsielhasnahladu adznačyŭ, što nie zacikaŭleny ŭ abmiežavańni pastavak pradukcyi biełaruskich pradpryjemstvaŭ, jon tolki vykonvaje ŭskładzienyja na jaho funkcyi. «Jak ja kazaŭ, adzinaje, u čym možna mianie abvinavacić, - u tym, što mała ŭvodziŭ abmiežavańniaŭ na pradpryjemstvy, imknuŭsia ŭrehulavać pytańni biez hetaha».
Nahadajem, 3 lutaha Alaksandr Łukašenka zajaviŭ, što ŭ dačynieńni da kiraŭnika Raśsielhasnahladu Siarhieja Dankvierta treba raspačać kryminalnuju spravu. U adkaz na heta Dankviert rekamiendavaŭ navieści paradak na biełaruskich pradpryjemstvach. 7 lutaha Ministerstva ŭnutranych spraŭ Biełarusi zajaviła, što pravodzicca šerah daśledčych pravierak pa dziejańniach, jakija ŭtrymlivajuć prykmiety dyskredytacyi dziełavoj reputacyi biełaruskich pradpryjemstvaŭ. 14 sakavika ŭ MUS paviedamili, što pravierka ŭ dačynieńni da Dankvierta «ciapier u samym razhary».
Sam Dankviert zajaviŭ, što ŭstrymajecca ad pajezdak u Biełaruś i što, kali i pryjedzie, to «tolki z telebačańniem», niahledziačy na zapeŭnivańni kiraŭnika Minsielhascharča Biełarusi Leanida Zajca, što toj harantuje Dankviertu viartańnie ŭ Rasiju. Taksama kiraŭnik rasijskaha viedamstva paprasiŭ źniać ź jaho abaviazki pa kantroli za pastaŭkami tavaraŭ ź Biełarusi.
