Mahiloŭski pravaabaronca Alaksandr Chamrataŭ dajšoŭ da suda ŭ sprobie vyśvietlić, čamu za ŭdzieł u niedazvolenym mitynhu 15 sakavika ŭ Mahilovie nie pakarali deputata Ihara Marzaluka, jaki vystupiŭ pierad prysutnymi, paviedamlaje Tut.by sa spasyłkaj na mspring.online.
Fota: Anžalika Vasileŭskaja, TUT.BY
UUS Mahiloŭskaha abłvykankama paviedamiła pravaabaroncu: raspačataja dadatkovaja pravierka dziejańniaŭ deputata padčas niesankcyjanavanaha mitynhu ŭ Mahilovie.
15 sakavika ŭ Mahilovie na vulicy Leninskaj prajšoŭ mirny mitynh za admienu dekreta № 3. Mierapryjemstva nie było dazvolena ŭładami. U centry horada sabrałasia kala piacisot čałaviek. Niekatoryja byli z transparantami.
Udzielniki mitynhu pa čarzie brali ŭ ruki miehafon i kazali pra toje, što ich chvaluje. Praz hadzinu paśla pačatku akcyi suprać dekreta № 3 na miesca zboru pryjšoŭ deputat Pałaty pradstaŭnikoŭ Nacyjanalnaha schodu Ihar Marzaluk. Jon uziaŭ u ruki miehafon, adnak vystupić nie zmoh — u vostruju palemiku ź im spačatku ŭstupiła žančyna, a zatym aśvistaŭ natoŭp z krykami «Hańba!» i «Sychodź».
Ihar Marzaluk pakinuŭ miehafon, ale nie syšoŭ. Jon zastaŭsia na miescy schodu, dzie dapazna adkazvaŭ na pytańni ludziej.
Paśla mitynhu zatrymali 9 čałaviek — usie jany vystupali ź miehafonam — i dastavili ŭ Leninskaje RAUS. Niepaŭnaletniaha chłopca praź niekalki hadzin adpuścili. Na nastupny dzień u sudzie Leninskaha rajonu razhledzieli spravy astatnich zatrymanych i vynieśli rašeńni: ad štrafu ŭ pamiery 10 bazavych vieličyń da 15 sutak aryštu za ŭdzieł u niesankcyjanavanym mierapryjemstvie. Studentku Alenu Kisiel, jakaja była aštrafavanaja na 15 bazavych vieličyń, paźniej adličyli z univiersiteta.
Pravaabaronca Alaksandr Chamrataŭ sprabuje damahčysia adkazu na pytańnie, čamu paśla vystupu ź miehafonam panieśli administracyjnuju adkaznaść usie, akramia deputata Ihara Marzaluka.
Aficyjnyja asoby Leninskaha RAUS dvojčy zajavili Chamratavu, što ŭ dziejańniach Marzaluka adsutničaje skład pravaparušeńnia. Namieśnik načalnika UUS Mahiloŭskaha abłvykankama Uładzimir Ryžankoŭ abviaściŭ Chamratavu, što na abłasnym uzroŭni jaho zvarot pa sutnaści razhladacca nie budzie.
12 krasavika pravaabaronca źviarnuŭsia ŭ sud Leninskaha rajona.
«Z metaj razumieńnia i acenki situacyi, a taksama pryčyn, jakija pasłužyli padstavaj dla vyzvaleńnia Marzaluka ad administracyjnaj adkaznaści, ja źviarnuŭsia z adpaviednym zapytam u kampietentnyja orhany, u čyje abaviazki ŭvachodzić dača pravavoj acenki dla dadzienaha vypadku. U svaim zapycie ja prasiŭ rastłumačyć, pa jakoj pryčynie na deputata nie składaŭsia pratakoł za ŭdzieł u niesankcyjanavanaj akcyi. Adkazam ź Leninskaha RAUS mnie było paviedamlena, što ŭ dziejańniach deputata niama składu pravaparušeńnia. Ja vyrašyŭ udakładnić abhruntavanaść takoha vyvadu, bo nie chaču parušać zakon i maju namier razumieć miažu pamiž «dabrom i złom». U paŭtornym adkazie z RAUS mnie paŭtorna zajavili ab fakcie adsutnaści składu pravaparušeńnia ŭ Marzaluka, biez usiakaha abhruntavańnia, što parušaje majo prava na atrymańnie infarmacyi», — ličyć Alaksandr Chamrataŭ.
Pravaabaronca praz sud pasprabuje nahadać supracoŭnikam RAUS ab svaim pravie na infarmacyju, u tym liku ab dziejnaści dziaržorhanaŭ i inšych subjektaŭ ułady. Jon prosić sud vynieści pryvatnaje vyznačeńnie ŭ adras Leninskaha RAUS, a taksama abaviazać ich dać adkaz pa sutnaści zadadzienaha pytańnia.