Siarod kandydataŭ u prezidenty Francyi na hety raz niamała nieardynarnych i navat kałarytnych postaciaŭ. Pryčym havorka nie tolki pra aŭtsajdaraŭ, ale i pra favarytaŭ. Najbolšyja šancy na pieramohu maje levy libierał Emaniuel Makron.
Maryna Lo Pen
Maryna Lo Pen i jaje ciapierašni spadarožnik žyćcia i pravaja ruka pa partyi Lui Aljo. Fota Closer.
48-hadovaja Maryna Lo Pen — dačka zasnavalnika Nacyjanalnaha frontu Žan-Mary Lo Pena.
Rasijskaja presa padaje Lo Pen abaroncaj tradycyjnych kaštoŭnaściej. Ale pra toje, u jakoj atmaśfiery jana hadavałasia, krasamoŭna śviedčyć toj fakt, što za chryščonaha baćku joj baćka zaprasiŭ hałoŭnaha suteniora paryžskaha rajona plas Pihal.
Inšy jaskravy fakt: staŭšy lidaram partyi, Maryna vyklučyła ź jaje svajho tatu. Takim čynam jana sprabavała źmianić jaje imidž. Antysiemityzm staroha Lo Pena joj nie prydavaŭsia.
Lo Pen pa adukacyi advakat, ale pa prafiesii amal nie pracavała, z maładości pajšła ŭ palityku.
Lo Pen była dvojčy zamužam, a apošnija 8 hadoŭ žyvie nieraśpisanaja z paplečnikam pa partyi.
Žan Luk Melanšon
Žan Luk Melanšon zakachany ŭ akciorku Saidu Džavad.
Žan Luk Melanšon stvaryŭ kaalicyju Front levych siłaŭ. Ale heta nie tyja levyja, jak Ziuhanaŭ i Atamanaŭ.
Melanšon — kłasičny francuzski sacyjalist-radykał. Siarod inšaha, jon mason, i jahonyja tata i dzied taksama byli masonami.
U Francyi ad XVIII st. isnuje mocnaja tradycyja antyklerykalnaha masonstva. U «Vialiki Uschod Francyi» na siońnia ŭvachodziać kala 1250 łožaŭ i 50 tysiač čałaviek.
Fiłosaf pa adukacyi, Melanšon pracavaŭ nastaŭnikam francuzskaj movy ŭ PTV, žurnalistam, a paśla pajšoŭ u palityku. Spačatku byŭ u Sacpartyi, ale pakinuŭ jaje, kali pabačyŭ, što levamu kryłu tam pieravahi nie dabicca.
U pryvatnym žyćci jon byŭ adnojčy žanaty, ale ciapier u razvodzie. Śvieckija chranikiory źviazvajuć jaho z akciorkaj z arabskimi karaniami.
65-hadovaha Melanšona možna nazvać ciomnym konikam hetych vybaraŭ.
Jon najlepšy pramoŭca siarod kandydataŭ, havoryć chlostka, tamu jahony rejtynh padskočyŭ paśla abodvuch teledebataŭ. Jon źbiraje najbolšyja natoŭpy na mitynhi. U Francyi navat zahavaryli pra «kamunistyčnuju pahrozu».
Kali Melanšon vyjdzie ŭ druhi tur ź Lo Pen, jon harantavana pieramoža. Suprać Lo Pen, zdajecca, luby pieramoža.
Na pasadzie prezidenta ž były ministr praftechadukacyi Melanšon, pry ŭsioj svajoj lubovi hrymieć i kidacca małankami, naŭrad ci zrobić niejkija pavarotnyja kroki. Jon budzie jak Cypras u Hrecyi: rezki na słovach, ale aściarožny ŭ ekanomicy.
Fransua Fijon
Fransua i Pieniełopa Fijon akazalisia ŭ centry skandału. Fota Closer.
Kandydat ad partyi «Respublikancy» 63-hadovy Fransua Fijon — kłasičny kansiervatar.
U jaho piaciora dziaciej ad adzinaha za žyćcio šlubu — z žonkaj-anhličankaj, darečy. Jon dobry katalik.
Adukacyja ŭ jaho jurydyčnaja, i ŭsio svaje žyćcio jon adpracavaŭ u palitycy, miascovaj i dziaržaŭnaj administracyi.
Jon maje najbolšy dośvied kiravańnia: byŭ ministram vyšejšaj adukacyi i navuki, paśla — infarmacyi i pošty, paśla — telekamunikacyj i pa pytańniach kosmasu, potym pracy i sacyjalnych pytańniaŭ, zatym — adukacyi (u Francyi heta adna z klučavych, samych prestyžnych pasad, francuzskaja škoła stvaryła francuzskuju nacyju). Narešcie, doŭhi čas, — premjer-ministram.
Fijon byŭ lidaram honki, pakul satyryčny časopis «Kanar anšene» nie apublikavaŭ infarmacyju, što kandydat ad «Respublikancaŭ» byŭ pracaŭładkavaŭšy ŭłasnuju žonku svajoj pamočnicaj jak deputata.
Na hetaj pasadzie jana atrymała ad dziaržavy dziasiatki tysiač jeŭra zarobku. Heta padkasiła kampaniju Fijona i vyvieła na pieršaje miesca Emaniuela Makrona.
Emaniuel Makron
39-hadovy Makron — samy małady kandydat. Najbolš niezvyčajny fakt ź jaho asabistaha žyćcia — jon u 17 hadoŭ syšoŭsia sa svajoj licejskaj nastaŭnicaj francuzskaj movy, starejšaj za jaho na 24 hady. Ich raman akazaŭsia mocny, nie adnadzionny. Aženiacca jany tolki praz 12 hadoŭ, kali jamu było 29, a joj — 53. Dziela hetaha Bryžyt Trańjo, majučy troje dziaciej, razyšłasia ź pieršym mužam.
U vypadku pieramohi Emaniuel Makron stanie nie tolki samym maładym prezidentam Francyi, ale i pieršym u śviecie kiraŭnikom dziaržavy, čyja žonka nastolki starejšaja za jaho. Fota Rojterz.
«Heta ja ŭhavaryła jaho iści ŭ prezidenty ciapier, — skazała jahonaja žonka, — praź piać hadoŭ prablemaj dla jaho była b maja morda [ma gueule]», — pažartavała Trańjo.
Joj ciapier 63, supolnych z Makronam dziaciej u ich niama. U časie kampanii ŭ sacsietki byli zapuščanyja čutki, što Makron u asabistym płanie «viadzie padvojnaje žyćcio», ale brud da Makrona nie prystaŭ.
Makron atrymaŭ fiłasofski dypłom, a paśla skončyŭ Narmalnuju škołu administracyi (jaje možna hruba paraŭnać z našaj Akademijaj kiravańnia).
Jon pačynaŭ karjeru ŭ dziaržaŭnaj inśpiekcyi finansaŭ, a paśla syšoŭsia ź finansistami hrupy Nestle i banka Rothschild. Tolki za dva hady z 2010 da 2012 hadoŭ jon jak bankir zarabiŭ bolš za 2 miljony jeŭra. U 2012 hodzie jaho, biespartyjnaha, pryznačajuć ministram finansaŭ u sacyjalistyčny ŭrad, što adkryvaje jamu darohu ŭ palityku.
Makron — nie pieršy centryst u historyi, jaki moža stać prezidentam Francyi. Da jaho byŭ, naprykład, Valery Žyskar d'Esten u 1980-ja. Ale ŭpieršyniu prezidentam «šaścikutnika», jak jašče nazyvajuć Francyju, moža stać čałaviek biez partyi. Makron abapirajecca na stvorany pad vybary čysta palittechnałahičny ruch En marche («U ruch»).
Makron — vidavočny ŭlubioniec finansavych kołaŭ Francyi. Jon taksama, vidać, padajecca Maskvie najhoršym kandydatam.
Prahramy kandydataŭ, sapraŭdy, istotna roźniacca. Melanšon choča, kab Francyja vyjšła z NATA. Lo Pen choča vychadu z zony jeŭra. Makron i Fijon pachodziać z tradycyjnaha isteblišmientu i byli b schilnyja praciahvać palityčny kurs Francyi apošnich dziesiacihodździaŭ. Sa svaimi niuansami: Makron — kłasičny levy libierał, vychadziec z bankaŭskich kołaŭ. Fijon — nie prosta kansiervatar, a tetčeryst. Jon ličyć, što Francyja ŭ niebiaśpiečnaj ekanamičnaj stahnacyi i ŭratavać jaje moža tolki radykalnaje skaračeńnie dziaržaŭnych vydatkaŭ.
Fijon vyłučaŭsia prarasijskaj rytorykaj, Lo Pen i Melanšon, spadziajucca ŭ Rasii, asłabili b Jeŭrasajuz i NATA — stratehičnyja zadačy Kramla. Ci aznačaje heta, što «boty Kramla» zamuciać niešta suprać Makrona pierad pieršym ci druhim turam?
U Francyi — prezidenckaja respublika, tamu ad prezidenta zaležyć šmat. Prezidentami krainy časta stanaviłasia značnyja histaryčnyja postaci. Šarl de Hol trymaŭsia pravych nacyjanalistyčnych pohladaŭ, Žorž Pampidu prasłaviŭsia jak unikalny znaŭca i miecenat mastactva, Fransua Miteran byŭ vieteranam-partyzanam i sacyjalistam, jaki, adnak, idealna ładziŭ z Ronaldam Rejhanam.
Vynik pieršaha tura vybaraŭ u Francyi pakul absalutna niepradkazalny. A voś pieramožcu druhoha tura možna budzie lohka sprahnazavać adrazu pa vynikach pieršaha.
Mnohija kandydaty majuć vyrazny admoŭny rejtynh.
Za tydzień da hałasavańnia sacyjołahi dajuć pa 22—23% hałasoŭ centrystu Emaniuelu Makronu i Marynie Lo Pen. Na adlehłaści, mała bolšaj za statystyčnuju pamyłku, za imi Melanšon i Fijon. Jany majuć pa 19—20% padtrymki. Ale
rejtynhi Makrona i Lo Pen apošni miesiac źnižalisia, a Fijona i Melanšona — raśli, voś čamu vyniku vybaraŭ nie moža pradkazać nichto.
U Francyi vielmi dakładnyja sacyjałahičnyja daśledavańni. Za ich vynikami možna sačyć tut.
