Pa dapamohu da hiniekołaha źviarnułasia haradžanka, jakoj treba było terminova ŭziać šlub z hramadzianinam Ukrainy. Za pasłuhu jana zapłaciła lekarcy 20 rubloŭ. Na łavie padsudnych — abiedźvie žančyny.
24 kastryčnika 2016 hoda 25-hadovaja žycharka Baranavičaŭ sa svaim chłopcam, hramadzianinam Ukrainy, pryjšła ŭ Baranavicki ZAHS padać zajavu. Maładyja ludzi chacieli raśpisacca ŭ toj ža dzień: časovaja rehistracyja chłopca ŭ našaj krainie skančałasia i jaho mahli departavać. Viasielle z hramadziankaj Biełarusi mahło vyrašyć hetuju prablemu. Adnak u ZAHSie maładym ludziam admovili i patłumačyli, što, pa praviłach, raśpisać paru mohuć jak minimum praz try dni paśla padačy zajavy. Pažanić ŭ toj ža dzień možna tolki pry najaŭnaści daviedki ab ciažarnaści, supolnaha dziciaci i da t.p.
Atrymaŭšy admovu ŭ ZAHSie, dziaŭčyna źviarnułasia da znajomaj, lekarki Baranavickaj radzilni. Taja, u svaju čarhu, paprasiła kalehu, zahadčycu adnaho z adździaleńniaŭ Baranavickaj radzilni, zrabić falšyvuju daviedku ab ciažarnaści na terminie 7-8 tydniaŭ. Zahadčyca nie admoviła, i ŭžo praź niekalki hadzin daviedka była hatova. Padziaki za svaju pasłuhu miedrabotnica nie prasiła. Daviedku pakinuła na stale ŭ ardynatarskaj i syšła na apieracyju.
Paśla apieracyi zahadčycy pieratelefanavała ŭsio taja ž kaleha i skazała, što ŭ jakaści ŭznaharodžańnia pakinuła ŭ kartcy adnoj z pacyjentak hrošy ŭ sumie 20 rubloŭ. Zahadčyca hrošy zabrała.
Para tym časam viarnułasia ŭ ZAHS z daviedkaj ab ciažarnaści.
- Ja praviarała daviedku: usie rośpisy i nieabchodnyja piačatki na joj byli. Sumnieńniaŭ u sapraŭdnaści jana nie vyklikała, - raspaviadała na pasiadžeńni suda 3 maja Śviatłana Vałyniec, načalnik adździeła ZAHS Baranavickaha harvykankama.
24 kastryčnika maładyja ludzi raśpisalisia.
Adzin ź lepšych hiniekołahaŭ horada
Padziaka ŭ pamiery 20 rubloŭ - heta nie ŭsie hrošy, jakija fihurujuć u kryminalnaj spravie. Śledstva śćviardžaje, što ad 2012 hoda lekar siem razoŭ prymała hrošy ŭ padziaku ad pacyjentaŭ. Ahulnaja suma ŭznaharodžańniaŭ, pa viersii śledstva, za hetyja piać hadoŭ skłała 290 dalaraŭ.
Usie kalehi abvinavačvanaj, jakija vystupali ŭ sudovaj zale 2 traŭnia ŭ jakaści śviedak, śćviardžajuć, što abvinavačanaja - vydatny śpiecyjalist, adzin z najlepšych baranavickich hiniekołahaŭ.
- Jana arhanizavała endaskapičnuju słužbu ŭ Baranavičach, vałodaje ŭsimi mietadami chirurhičnych apieracyj, jakija pravodziacca ŭ radzilnym domie. Jana dapamahła vielmi mnohim, - kazała na pasiadžeńni suda 2 maja Alena Šastak, hałoŭny lekar Baranavickaha radzilnaha doma.
Lekarka abvinavačvajecca ŭ pryniaćci niezakonnaha ŭznaharodžańnia (č. 1 art. 433 KK RB), a taksama ŭ tych ža dziejańniach, učynienych paŭtorna (č. 2 art. 433 KK RB). Maksymalnaje pakarańnie, praduhledžanaje hetymi artykułami, - piać hadoŭ pazbaŭleńnia voli.
Zamoŭcu daviedki vinavaciać u padrobcy dakumientaŭ (č. 1 art. 380 KK RB). Maksimalnaje pakarańnie pa dadzienym artykule - abmiežavańnie voli terminam da dvuch hadoŭ.
Sud zasłuchaje pakazańni abvinavačanych na nastupnych pasiedžańniach.
