Ukrainskaje adździaleńnie arhanizacyi Amnesty International asudziła zatrymańnie demanstrantaŭ z savieckaj simvolikaj padčas demanstracyi z nahody 9 maja.
Napiaredadni ŭ Dniapry adbyłasia bojka pamiž udzielnikami «Maršu pieramohi» i vieteranami ATA. Kanflikt razhareŭsia z-za vykarystańnia na šeści savieckaj atrybutyki. U vyniku bojki častka ludziej była zatrymanaja.
Dyrektarka ŭkrainskaha pradstaŭnictva Amnesty International Aksana Pakalčuk nazvała niedapuščalnymi zatrymańnie mirnych hramadzian i zabaronu savieckaj simvoliki.
«Takija miery nie tolki nie vyzvalajuć Ukrainu ad savieckaj spadčyny, ad drakonaŭskich zakonaŭ i praktyk savieckich časoŭ, ale, naadvarot, zbližajuć ź imi nas i našu krainu», — skazała Pokalčuk.
U Amnesty International ličać, što zabarona simvoliki, źviazanaj z kamunistyčnaj partyjaj i savieckim minułym, parušaje prava na svabodu vykazvańnia mierkavańnia, a zatrymańnie ŭdzielnikaŭ mirnych akcyj — heta krok da abmiežavańnia svabody słova i schodaŭ z boku ŭkrainskich uładaŭ.
U arhanizacyi zapatrabavali vyzvalić usich zatrymanych demanstrantaŭ i rasśledavać vypadki prymianieńnia siły na jakija prajšli 9 maja akcyjach.
Jašče 6 maja kiraŭnik MUS Ukrainy Arsien Avakaŭ zajaviŭ, što pravaachoŭnyja orhany buduć spyniać antyŭkrainskija prajavy 9 maja.
«Na ŭsich demanstracyjach i maršach, zapłanavanych u hety dzień, padraździaleńni Nacyjanalnaj palicyi i Nachvardyi nie pacierpiać ni antyŭkrainskuju simvoliku, ni antyŭkrainskija zajavy! Usie adpaviednyja sproby z boku sił, jakija prahnuć pravakacyj, buduć spynienyja», — zajaviŭ jon.
Zakon ab dekamunizacyi byŭ pryniaty va Ukrainie ŭ krasaviku 2015 hoda. Akramia zabarony na vykarystańnie savieckaj simvoliki, dakumient taksama ŭtrymlivaje pradpisańnie ab demantažy pomnikaŭ kamunistyčnym dziejačam i pierajmienavańni nazvanych u ich honar nasielenych punktaŭ i vulic.
