Siońnia skončylisia 15 sutak aryštu Paŭła Sieviarynca i Maksima Viniarskaha, zatrymanych paśla akcyi 1 maja ŭ Minsku.
Palitykaŭ na Akreścina sustrakali svajaki, siabry i paplečniki: Volha Sieviaryniec, staršynia Ruchu «Za Svabodu» Jury Hubarevič, sustaršynia arhkamiteta BCHD Vital Rymašeŭski, staršynia BNF Alaksiej Janukievič, a taksama Dzianis Sadoŭski, Natalla Bordak, Volha Kavalkova, Natalla Samatyja, Leanid Kułakoŭ, Juraś Łukaševič, Nasta Daškievič, Alaksiej Šein, Barys Harecki i inš.
Hetuju sustreču na surjoznym uzroŭni pilnavała i milicyja: pobač było zaŭvažana niekalki słužbovych mašyn, pryjechała haradskoje načalstva, zdymki viali apieratary ŭ cyvilnym.
Pavieł i Maksim raspaviali, što na Akreścina im admysłova imknulisia stvaryć nievynosnyja ŭmovy: ludziej u kamiery było bolš, čym miescaŭ, časta padsažvali badziah — brudnych, z vošami. Zabirali asadki, nie davali papieru. Padčas aryštu Maksim Viniarski abviaściŭ haładoŭku — siońnia byŭ jaje apošni dzień. Viačasłaŭ Siŭčyk, jaki zastajecca za kratami, praciahvaje haładać.