18 maja na pazačarhovaj kanfierencyi źmianiŭsia kiraŭnik Biełaruskaj tenisnaj fiederacyi. Jak paviedamlaje aficyjny sajt BTF, na pasadu staršyni arhanizacyi abrany Siarhiej Ciacieryn. Jon źmianiŭ na hetaj pasadzie biznesmena Alaksandra Šakucina, jaki ŭznačalvaŭ Biełaruskuju tenisnuju fiederacyju z 2012 hoda, piša Tut.by.
Siarhiej Ciacieryn. Fota: tennis.by
Siarhiej Ciacieryn padziakavaŭ delehatam za davier i adznačyŭ, što kožny kiraŭnik fiederacyi tenisa ŭnios svoj nieacenny ŭkład u raźvićcio hetaha vidu sportu ŭ Biełarusi.
— Čatyry hady tamu była ŭniesienaja kandydatura Šakucina Alaksandra Vasiljeviča na hetuju pasadu. I ja dumaju, što kožny z vas, sutyknuŭšysia za hety pieryjad ź jaho pracaj, moža adnaznačna skazać, što zroblena vielmi šmat, vybudavanaja cełaja sistema, pačynajučy z raźvićcia materyjalnych baz i zakančvajučy spartyŭnaj pracaj. Źjavilisia novyja treniery, a biełaruskija tenisisty paśpiachova vystupajuć na suśvietnych kortach, źjavilisia novyja vielmi vysokija vyniki. Ja chaču skazać jamu vialiki dziakuj, padziakavać za ŭsio, što zroblena. Sa svajho boku chaču paabiacać, što ŭsie tyja pačatki i dumki, jakija im byli zapłanavanyja, buduć praciahnutyja, — skazaŭ Siarhiej Ciacieryn.
Alaksandr Šakucin. Fota: tennis.by
Siarhiej Ciacieryn prapanavaŭ nadać Alaksandru Šakucinu zvańnie hanarovaha siabra Biełaruskaj tenisnaj fiederacyi.
Najlepšych dasiahnieńniaŭ zbornyja Biełarusi ŭ časy kiraŭnictva BTF Alaksandram Šakucinym damahlisia ŭ hetym hodzie. Heta vychad žanočaj kamandy ŭ finał Kubka Fiederacyi, dzie 11-12 listapada ŭ Minsku jana pazmahajecca z družynaj ZŠA. A taksama praryŭ mužčynskaj kamandy ŭ płej-of suśvietnaj hrupy Kubka Devisa. Na hetaj stadyi biełarusy vystupiać upieršyniu za 10 hadoŭ.
Siarhiej Ciacieryn da hetaha dnia byŭ namieśnikam staršyni RHA «BTF». Majstar sportu SSSR pa tenisie, čempijon Jeŭropy siarod junakoŭ, člen zbornaj SSSR siarod junakoŭ, nieadnarazovy kapitan nacyjanalnaj mužčynskaj zbornaj u Kubku Devisa. Mienavita pad jaho kiraŭnictvam biełaruskaja kamanda damahłasia samaj hučnaj pieramohi, u 2004 hodzie, u časy roskvitu karjer Uładzimira Vałčkova i Maksima Mirnaha, prabiŭšysia ŭ paŭfinał Kubka Devisa.
Siarhiej Ciacieryn niekali dałučyŭ da tenisa Alaksandra Łukašenku i z časam staŭ adnym z samych blizkich da jaho ludziej, časta supravadžaje jaho na niefarmalnych mierapryjemstvach.
Raniej Siarhiej Ciacieryn źjaŭlaŭsia pieršym namieśnikam ministra sportu i turyzmu, pamočnikam prezidenta pa sporcie, dyrektaram alimpijskaha spartkompleksu «Raŭbičy», dyrektaram Respublikanskaha centra alimpijskaj padrychtoŭki pa tenisie, vice-prezidentam Nacyjanalnaha alimpijskaha kamiteta.
Viasnoj 2016 hoda stała viadoma, što Siarhiej Ciacieryn źjaŭlajecca dyrektaram mnhoprofilnoj kampanii «BiełHłobałStart», dzie jaho namieśnik — były pamočnik Alaksandra Łukašenki pa sporcie Ihar Zaičkoŭ. Pačatak biznesu byŭ pakładzieny ŭ 2013 hodzie. Praz hod «BiełHłobałStart» staŭ hałaŭnoj arhanizacyjaj chołdynhu, jaki abjadnaŭ pad svaim kiravańniem niekalki kampanij, jakija zajmajucca roznaj dziejnaściu: «BiełHłobałStar», «BiełHłobałHarant» i «BiełHłobałTon».
