MNS Rasii
Pierad padzieńniem Tu-154 Minabarony Rasii ŭ Čornaje mora ŭ śniežni 2016 hoda kamandzir pavietranaha sudna Raman Vołkaŭ drenna aryjentavaŭsia ŭ prastory. Pra heta sa spasyłkaj na nienazvanych udzielnikaŭ rasśledavańnia i ekśpiertaŭ napisaŭ «Kommiersant» adrazu paśla publikacyi aficyjnaj viersii Minabarony pra mahčymuju vinu piłota ŭ katastrofie.
Jak śćviardžajuć krynicy haziety, pierad adpraŭkaj z aeraporta Sočy Vołkaŭ nie adrazu zrazumieŭ, ź jakoj ź dźviuch uźlotna-pasadačnych pałos jon pavinien uźlatać. Zatym, užo ŭ pavietry, jon pačaŭ «emacyjna, z užyvańniem nienarmatyŭnaj leksiki, vyśviatlać u ekipaža, jakim mienavita kursam jany ŭźlacieli». Nijakich kankretnych cytat z bartavych samapiscaŭ vydańnie nie pryvodzić.
Samalot, pa viersii ananimnych krynic «Kommiersanta», pačaŭ nabor vyšyni z patrebnym vuhłom 15 hradusaŭ, ale zatym Vołkaŭ adchiliŭ šturvał ad siabie, zamarudziŭšy ŭzdym. Na 53-j siekundzie palotu kamandzir rasparadziŭsia prybrać zakryłki, choć Tu-154 jašče nie padniaŭsia da 500 mietraŭ. U vyniku na adznacy 231 mietr samalot pačaŭ źnižacca.
Paśla hetaha Vołkaŭ, jak adznačaje «Kommiersant», ździejśniŭ «samahubnyja» dziejańni: jon rezka nachiliŭ bort naleva, zadaŭšy jamu nachił 53 hradusy.
Heta paskoryła źnižeńnie, a ŭžo na 73-j siekundzie samalot začapiŭ levym kryłom vadu i razvaliŭsia. Nienazvanyja ekśpierty haziety nazvali takija pavodziny «paničnym šarachańniem z boku ŭ bok čałavieka, jaki nibyta zabłukaŭ u lesie», jany paličyli, što Vołkaŭ aryjentavaŭsia nie na prybory, a na svaje padmanlivyja adčuvańni.
«Kommiersant» taksama pakazvaje, što Minabarony paćvierdziła viersiju pra stratu piłotam aryjentacyi, jakuju hazieta vyłučała «ŭ jakaści pryjarytetnaj jašče 9 studzienia». Pry hetym u sakaviku «Kommiersant» pisaŭ, što dziejańni Vołkava nahadvali režym pasadki na vadu.
