Inśpiektary spynili čorny BMV. Kiroŭca vyrašyŭ nie zdavacca.
Adbyŭsia incydent u noč na niadzielu 21 maja, prykładna ŭ 3.20. Aŭtamabil pryciahnuŭ uvahu inśpiektaraŭ svaim nieadekvatnymi pavodzinami na darozie. «Daišniki prapanavali spynicca, ale kiroŭca BMV nie adreahavaŭ i vyrašyŭ źbiehčy — jon pačaŭ ruch u bok vulicy Kirava. Ale kala doma №2 pa nazvanaj vulicy jaho aŭtamabil pa techničnych pryčynach spyniŭ ruch», — raspavioŭ śledčy Pinskaha miežrajonnaha adździeła SK Michaił Čystoŭski pinskamu partału varjag.net
Za styrnom byŭ 27-hadovy pinčuk. Kali mašyna spyniłasia, jon kinuŭ aŭto i vyrašyŭ źbiehčy. Supracoŭniki milicyi pasprabavali zatrymać mužčynu, ale toj pačaŭ adbivacca. U pracesie jon navat ukusiŭ adnaho ź milicyjantaŭ.
Vyśvietliłasia, što mužčyna byŭ pjany — u kryvi znajšli 1,2 pramile. Plus — maje niepahašanuju sudzimaść za abarot narkotykaŭ.
Ale ciapier, zamiest sankcyj za pjanaje kiravańnie, parušalniku pryjdziecca jašče adkazvać i za hvałtoŭnyja dziejańni ŭ dačynieńni da supracoŭnika DAI.
«U ciapierašni čas u dačynieńni da hetaha hramadzianina raspačata kryminalnaja sprava. Dadzieny hramadzianin zatrymany, znachodzicca ŭ IČU Pinskaha HAUS. Zaraz vyrašajecca pytańnie ab užyvańni miery strymańnia ŭ dačynieńni da hetaha hramadzianina», — rastłumačyŭ Michaił Čystoŭski.
Daišnik, jakoha ŭkusili, padčas zatrymańnia «złaviŭ» jašče niekalki ŭdaraŭ. Siońnia jon usio jašče na balničnym.
