Pastanovu ab vydzialeńni 430 600 rubloŭ dla praduchileńnia zatapleńnia karjera «Hraleva» adkrytaha akcyjaniernaha tavarystva «Dałamit» u Rubie 5 červienia vydaŭ urad Biełarusi. Pra heta paviedamlajuć «Narodnyja naviny Viciebska».
Karjer «Hraleva» adkrytaha akcyjaniernaha tavarystva «Dałamit» u Rubie, 2011 hod. Fota Siarhieja Sierabro
Zhodna z hetaj pastanovaj, hrošy pavinny być vydzielenyja Ministerstvam finansaŭ da kanca pieršaha paŭhodździa 2017 hoda sa srodkaŭ respublikanskaha biudžetu, praduhledžanych na finansavańnie raschodaŭ, źviazanych sa stychijnymi biedstvami, avaryjami i katastrofami.
Tranš u 430 600 rubloŭ nakirujuć Ministerstvu architektury i budaŭnictva dla AAT «Dałamit», hetyja hrošy pryznačanyja dla zakupki abstalavańnia, patrebnaha dla zabieśpiačeńnia bieśpierabojnaj pracy pompavaj stancyi, i terminovych ramontaŭ, jakija dazvolać paźbiehnuć zatapleńnia karjera «Hraleva» ŭ Rubie vadoj, jakaja prybyvaje.
Viarnuć hrošy ŭ biudžet dziaržavy pavinien budzie vinavaty ŭ nadzvyčajnaj situacyi, a sačyć za hetym daručana Ministerstvu architektury i budaŭnictva.
U kancy traŭnia pa rasparadžeńni premjer-ministra Andreja Kabiakova była stvorana mižviedamasnaja rabočaja hrupa, jakaja pavinna vyznačyć pryčyny padtapleńnia adzinaha karjera pa zdabyčy dałamitu ŭ Biełarusi. Hetuju hrupu ŭznačaliŭ namieśnik ministra architektury i budaŭnictva Alaksandr Sidaraŭ, a kaardynuje vykanańnie rasparadžeńnia premjer-ministra jaho namieśnik Anatol Kalinin. Vyśvietlić, ź jakoj pryčyny pavialičyŭsia vadaciok u karjery «Hraleva», ekśpierty pavinny da 31 śniežnia 2017 hoda.
Padčas raspracoŭki spravazdačy ab uździejańni na navakolnaje asiarodździe budaŭnictva Viciebskaj HES u Łužaśnie akazałasia, što dla prahnoznaj acenki prytoku vady ŭ karjer «Hraleva» patrebnyja admysłovyja hidrahieałahičnyja daśledavańni.
Tamu ŭ 2014 hodzie praviali dadatkovuju acenku prytoku vady ŭ dałamitavy karjer. Filijał «Hieadezičnaj ekśpiedycyi» acaniŭ 13 prytokaŭ vady ŭ «Hraleva» i pryjšoŭ da vysnovy, što pry zapaŭnieńni vadaschovišča Viciebskaj HES da NPU (narmalnaha podpornaha ŭzroŭniu) 139 mietraŭ dadatkovych prytokaŭ vady ŭ karjery z boku Dźviny budzie składać usiaho 15 780 kubičnych mietraŭ.
Pavodle acenki śpiecyjalistaŭ, taki abjomu vady skłaŭ by 3,7% ad ahulnaha prytoku vady ŭ karjery. Takim čynam, jon by znachodziŭsia nižej za pryniatuju dakładnaść hidrahieałahičnych raźlikaŭ, roŭnuju 5—10%, a tamu, jak było zajaŭlena ŭ spravazdačy, źjaŭlaŭsia nieistotnym.
