Učora ŭviečary adbyłasia niefarmalnaja sustreča Alaksandra Kazulina ź liderami niezarehistravanaj arhanizacyi, na jakoj eks‑kandydat ŭ prezydenty i ŭžo były palitviazień padzialiŭsia svaim bačańniem hramadzka‑palityčnaj sytuacyi ŭ Biełarusi i vykazaŭ žadańnie ŭstupić u šerahi «Maładoha frontu».
Sustrakajučysia ź liderami Maładoha Frontu Źmitrom Daškievičam, Arturam Fińkievičam i Nastaju Pałažankaj, Alaksandar Kazulin zaznačyŭ, što źbirajecca prymać jak maha bolej aktyŭny ŭdzieł u ciapierašniaj elektaralnaj kampanii, padkreśliŭšy važkaść fiksacyi šmatlikich pravaparušeńniaŭ padčas vybarčaj kampanii i, naturalna, razhladu taktyki bajkotu iłžyvych vybaraŭ i nieabchodnaści baranić praŭdu ŭ dzień hałasavańnia.
«Alaksandar Kazulin chacia i schudnieły, ale, nie zvažajučy na ŭsie niahody, pačuvaje siabie davoli badziora i aptymistyčna, — havoryć staršynia «Maładoha frontu» Źmicier Daškievič. — jon poŭny planaŭ na budučyniu i vieryć u chutkija pieramieny. Spadar Alaksandar zaznačyŭ taksama, što ŭściešany niepachisnaj moładździu, jakaja praciahvaje mužna zmahacca za spraviadlivaść i paprasiŭ pryniać jaho ŭ skład «Maładoha frontu». Što my z radaściu i zrabili na pasiedžańni Ŭpravy, nadaŭšy spadaru Alaksandru status hanarovaha siabra «Maładoha frontu».
