U Biarozie śledčyja vyśviatlajuć abstaviny elektratraŭmavańnia 15-hadovaha padletka padčas rybałki. Pra heta paviedamiła BIEŁTA aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova.
Biarozaŭski rajonny adździeł Śledčaha kamiteta pravodzić pravierku pa fakcie atrymańnia cialesnych paškodžańniaŭ padletkam u vyniku paražeńnia elektryčnym tokam viečaram 26 červienia ŭ čas rybałki na čyhunačnym moście praz raku Jasielda. Pavodle papiaredniaj viersii, jon zakranuŭ vudzilnam liniju elektrapieradačy. Niepaŭnahadovy byŭ biez supravadžeńnia darosłych, chutkuju dapamohu jamu vyklikali vidavočcy. Paciarpieły špitalizavany z apiokami i traŭmami hałavy ŭ reanimacyjnaje adździaleńnie Biarozaŭskaj centralnaj rajonnaj balnicy.
Na moście byli infarmacyjnyja nadpisy, jakija zabaraniajuć chadžeńnie pa puciepravodzie. Padletak žyvie ŭ Biarozie i vychoŭvajecca ŭ poŭnaj šmatdzietnaj siamji. Jana charaktaryzujecca stanoŭča.
USK pa Bresckaj vobłaści nahadvaje pra niebiaśpieku znachodžańnia pablizu linii elektrapieradačy, a taksama pra niedapuščalnaść rybnaj łoŭli la šluzaŭ i pompavych stancyj, z čyhunačnych mastoŭ i płacin, pobač ź inšymi hidratechničnymi zbudavańniami, dzie heta zabaroniena.
