Sproba prabracca na terytoryju Biełarusi i skraści koniej sa stajni AAT «Zavidaŭskaje» ŭ Homielskaj vobłaści vielmi sumna skončyłasia dla dvuch žycharoŭ Złynkoŭskaha rajona rasijskaj Branščyny. Adzin ź ich, chutčej za ŭsio, patanuŭ u biełaruskim bałocie, a druhi —zatrymany milicyjaj, pieradaje by24.org sa spasyłkaj na «Praŭda-Homiel».
Ilustracyjnaje fota: zamok.org
Kraści žyvioł rasijanie vyrašyli pad pokryvam nočy. Jany sarvali zamok na dźviarach stajni, raźmieščanaj na terytoryi małočna-tavarnaj fiermy pradpryjemstva, złavili adnaho kania, sputali i pryviazali da słupa. Hetaha im padałosia mała, i jany vyrašyli vykraści jašče i žarabia. U hety momant pilny vartaŭnik AAT «Zavidaŭskaje» Alaksandr Chasanbiekaŭ uvajšoŭ u chleŭ i parušyŭ usie płany złamyśnikaŭ.
Rasijskija hości kinulisia naŭcioki. Vartaŭnik nie razhubiŭsia i kinuŭsia ŭ pahoniu, adnačasova paviedamiŭšy pa telefonie pra zdareńnie ŭ milicyju, pamiežnikam i kiraŭnictvu haspadarki. Dapamoha prybyła nieadkładna.
U vyniku sumiesnymi namahańniami supracoŭnikaŭ siłavych viedamstvaŭ adnaho sa złačyncaŭ udałosia zatrymać. Im akazaŭsia 27-hadovy biespracoŭny žychar pasiołka Vyškaŭ Złynkoŭskaha rajona Branskaj vobłaści Rasii. Zatrymany daŭ pryznalnyja pakazańni, i ŭ jaho adnosinach raspačali kryminalnuju spravu pa artykule 205 KK Biełarusi — «Kradziež».
Imia druhoha zmoŭščyka vyjaŭlenaje, i jon ciapier znachodzicca ŭ vyšuku, ab čym biełaruskija pravaachoŭniki apaviaścili svaich rasijskich kaleh. Praŭda, šancaŭ znajści kanakrada vielmi mała: na dumku miascovych žycharoŭ, uciakajučy ad pahoni, jon zajšoŭ u bahnistuju miascovaść, dzie patanuŭ u dryhvie. Vybracca adtul žyvym praktyčna nikomu nie ŭdavałasia, i navat znajści trup nie ŭjaŭlajecca mahčymym.
«Zachavać kazionnych skakunoŭ i zatrymać złamyśnika dapamahli prafiesijnyja dziejańni 32-hadovaha vartaŭnika fiermy, — padkreśliŭ u hutarcy z žurnalistami aficyjny pradstaŭnik UUS Homielskaha abłvykankama Vital Prystromaŭ. — U chodzie milicejskich rejdaŭ pa abjektach APK dadzieny rabotnik nieadnarazova prachodziŭ śpiecyjalny instruktaž na vypadak sproby kradziažu daručanaj jamu pad achovu majomaści».
Košt kania, jakoha rasijskija kanakrady tak i nie zmahli vykraści ź biełaruskaha ahrapradpryjemstva, ekśpierty acanili ŭ 996 rubloŭ. A cana žarabiaci, jakoha taksama ŭdałosia źbierahčy — 1080 rubloŭ. Chutčej za ŭsio, vartaŭnik Alaksandr Chasanbiekaŭ pa zaviaršeńni rasśledavańnia budzie premiravany.
