Biełaruś zaprosić na vučeńni «Zachad-2017» naziralnikaŭ z AAN, ABSIE, NATA, SND, ADKB, Čyrvonaha kryža, Łatvii, Litvy, Polščy, Ukrainy, Estonii, Šviecyi i Narviehii, a taksama vajennych ataše, akredytavanych pry pasolstvach u Biełarusi. Pra heta zajaviŭ pres-sakratar MZS Dźmitryj Mirončyk na bryfinhu.
Mirončyk paŭtaryŭ, što vučeńni «Zachad-2017» nosiać płanavy charaktar i nie niasuć kamu-niebudź pahrozy. A jašče ŭ kancy 2016 hoda Biełaruś prainfarmavała ŭsie krainy ABSIE ab majučych adbycca vučeńniach, jak hetaha patrabuje Vienski dakumient 2011 hod pra miery ŭmacavańnia davieru i biaśpieki.
— Nie paźniej čym za 42 dni da pačatku mierapryjemstva dziaržavam-udzielnicam ABSIE budzie nakiravana ŭsia nieabchodnaja infarmacyja pa vučeńniach.
Pres-sakratar MZS taksama raskazaŭ, što ŭčora na palach samita pa supracoŭnictvie i biaśpieki ABSIE namieśnik načalnika Hienštaba US Biełarusi zrabiŭ «razhornuty bryfinh, pryśviečany vučeńniam».
— Aficyjna i na vysokim uzroŭni dziaržavam ABSIE była pradstaŭlena infarmacyja pra zadumu i scenary vučeńniaŭ, ich asnoŭnyja mety i zadačy, miescach praviadzieńnia, siłach i srodkach, jakija buduć zadziejničany. Na placoŭcy ABSIE my jašče raz asabliva padkreślili, što vučeńni «Zachad-2017» nosiać vyklučna abarončy charaktar.
Ahulnaja kolkaść vojskaŭ nie pieravysić 13 tysiač čałaviek, a značyć, pa Vienskim dakumiencie, Biełaruś nie abaviazanaja zaprašać mižnarodnych naziralnikaŭ, adznačyŭ Mirončyk.
- U toj ža čas, kirujučysia pryncypam prazrystaści i dziejničajučy ŭ duchu dobraj voli, Biełaruś u inicyjatyŭnym paradku nakiroŭvaje zaprašeńnia dla ŭdziełu ŭ nazirańni ŭ aktyŭnaj fazie vučeńniaŭ pradstaŭnikam mižnarodnych arhanizacyj.
Pa słovach pres-sakratara, zaprašeńni buduć adpraŭlenyja AAN, ABSIE, NATA, SND, ADKB, Mižnarodnamu kamitet Čyrvonaha kryža, vajskovym ataše, akredytavanych pry ambasadach u Biełarusi, vajennym naziralnikam ad Łatvii, Litvy, Polščy, Ukrainy, Estonii, Šviecyi i Narviehii.
- Tamu zakłapočanaści i zaściarohi niekatorych krain i palitykaŭ nosiać absalutna štučny charaktar i ŭłaścivy bolš časoŭ chałodnaj vajny, čym ciapierašniaj realnaj situacyi. Para spyniać šukać čornuju kotku ŭ čornaj pakoi. Jaje tam niama. Nakolki mnie viadoma, litaralna siońnia pa linii Minabarony buduć nakiravanyja zaprašeńni.
Užo niekalki miesiacaŭ dypłamaty i čynoŭniki z Ukrainy, Litvy i Estonii vykazvajuć roznyja aściarohi z-za vučeńniaŭ: pačynajučy ad paprokaŭ u ahresiŭnaj nakiravanaści, da padazreńniaŭ u tym, što na samoj spravie Rasieja ŭviadzie bolš, čym 3 tysiačy zajaŭlenych vajennasłužačych, abo pakinie tut svajo ŭzbrajeńnie i vajennuju techniku.