Rasija pavinna vypłacić Niderłandam kampiensacyju ŭ pamiery 5,4 młn jeŭra za zatrymańnie sudna Arctic Sunrise z aktyvistami «Hrynpis» vosieńniu 2013 hoda. Takoje rašeńnie vynies arbitraž, stvorany pry Pastajannaj pałacie traciejskaha suda ŭ Haazie, paviedamlaje VVS.
Getty
Zhodna z pastanovaj, bolš za 1,6 młn jeŭra Maskva pavinna vypłacić u jakaści kampiensacyi naniesienaj sudnu škody, 3 młn jeŭra — za materyjalnuju i niemateryjalnuju škodu, naniesienuju ludziam, jakija znachodzilisia na borcie, 625 tysiač jeŭra — za avansy na apłatu arbitražnych vydatkaŭ, a taksama 13,5 tysiač jeŭra — za vydatki, paniesienyja Niderłandami ŭ suviazi z vypuskam bankaŭskaj harantyi.
Akramia taho, Rasija pavinna vypłacić pracenty na ŭsie hetyja sumy.
Rašeńnie arbitražu vitali ŭ «Hrynpis». «Šlach da spraviadlivaści byŭ doŭhim, ale rašeńnie trybunała śćviardžaje viaršenstva zakona i prava na mirny pratest na mory, u tym liku — suprać zdabyčy nafty ŭ Arktycy», — zajaviŭ starejšy juryskonsult «Hrynpis Internešnł» Džaśpier Teŭlinhs.
Taksama rašeńnie Haahi prakamientavaŭ fatohraf Dzianis Siniakoŭ, jaki byŭ zatrymany razam z ekołahami. «Hetych hrošaj my, jasnaja sprava, nie ŭbačym, ale adčuvać siabie raptam patencyjna bahatym vielmi pryjemna. Pravymi my byli i da hetaha. Dziakuj sudu, što heta jašče raz paćvierdziŭ. I viadoma, save the Arctic!» — napisaŭ jon na svajoj staroncy ŭ fejsbuku.
Kamanda hałandskaha sudna Arctic Sunrise była zatrymanaja rasijskimi ŭładami 19 vieraśnia 2013 hoda paśla sproby pravieści akcyju pratestu na naftazdabyvajučaj płatformie ŭ Barancavym mory. Sudna było adbuksavanaje ŭ Murmansk, a 30 čałaviek, jakija znachodzilisia na borcie, byli aryštavanyja. Pieršapačatkova ich abvinavacili ŭ piractvie, adnak paźniej abvinavačvańni byli pierakvalifikavanyja ŭ chulihanstva.
U listapadzie 2013 hoda členy kamandy Arctic Sunrise byli vyzvalenyja pad zakład u pamiery kala $34 tysiač, a ŭ kancy śniežnia taho ž hoda jany trapili pad amnistyju, abvieščanuju ŭ suviazi z 20-hodździem rasijskaj kanstytucyi. U červieni 2014 hoda z sudna Arctic Sunrise byŭ źniaty aryšt, a ŭ žniŭni jano viarnułasia ŭ Amsterdam.
Arbitražnaje raźbiralnictva ŭ suviazi z zatrymańniem Arctic Sunrise było inicyjavanaje Niderłandami ŭ kastryčniku 2013 hoda. U skład arbitražu ŭvajšli pradstaŭniki Aŭstralii, Niderłandaŭ, Polščy, Mieksiki i Hany.
Rašeńnie pa sutnaści sud u Haazie vynies u žniŭni 2015 hoda, pastanaviŭšy, što Rasija parušyła svaje abaviazacielstvy pa kanviencyi AAN pa marskim pravie, zrabiŭšy vysadku na bort, daśledavańnie, ahlad, aryšt, zatrymańnie i zachop Arctic Sunrise biez papiaredniaj zhody Niderłandaŭ, a taksama ŭčyniŭšy aryšt, zatrymańnie i inicyjavańnie sudovaha razboru suprać 30 čałaviek, jakija znachodzilisia na borcie sudna.
Adnak tady arbitraž adkłaŭ pytańnie vyznačeńnia pamieru kampiensacyi i pracentaŭ da bolš poźniaha etapu razboru.
