20 lipienia ŭ Brusieli Jeŭrapiejski Sajuz i Biełaruś praviaduć čarhovy raŭnd dvuchbakovaha Dyjałohu pa pravach čałavieka.
Jak paviedamlajecca ŭ pres-relizie pradstaŭnictva Jeŭrasajuza ŭ Biełarusi, delehacyju ES budzie ŭznačalvać kiraŭničy dyrektar pa pytańniach Jeŭropy i Centralnaj Azii ŭ Jeŭrapiejskaj słužbie zamiežnych dziejańniaŭ Tomas Majer-Chartynh. Biełaruskuju delehacyju budzie ŭznačalvać namieśnik ministra zamiežnych spraŭ Aleh Kraŭčanka. U jaje ŭvojduć pradstaŭniki biełaruskaha ministerstva zamiežnych spraŭ i inšych profilnych ministerstvaŭ.
Pradstaŭniki biełaruskich arhanizacyj hramadzianskaj supolnaści i niedziaržaŭnych arhanizacyj taksama voźmuć udzieł u abmierkavańniach.
Padčas čaćviortaha raŭnda Dyjałohu pamiž ES i Biełaruśsiu baki razhledziać šyroki śpiektr pytańniaŭ, źviazanych z pravami čałavieka i demakratyjaj jak u Biełarusi, tak i ŭ ES, i abmiarkujuć supracoŭnictva ŭ prasoŭvańni pravoŭ čałavieka na mižnarodnych placoŭkach, u tym liku z dapamohaj miechanizmaŭ AAN.
ES advodzić pytańniam pravoŭ čałavieka centralnaje miesca ŭ svaich zamiežnych adnosinach i viadzie dyjałohi pa pravach čałavieka sa šmat jakimi krainami va ŭsim śviecie. U 2001 hodzie Rada ES pryniała Kiraŭničyja pryncypy Dyjałohaŭ pa pravach čałavieka z trecimi krainami, jakija byli pierahledžany ŭ 2009 hodzie. Treciaja sustreča ŭ ramkach Dyjałohu pa pravach čałavieka adbyłasia ŭ Minsku prykładna hod tamu.
