Pradstaŭniki Ministerstva achovy zdaroŭja Biełarusi da Ŭsiaśvietnaha dnia baraćby z hiepatytam zajavili, što leki ad hetaj chvaroby značna patańnieli: źjavilisia ajčynnyja analahi.
«Nia vylečyŭ hiepatyt ciapier tolki toj, kamu na siabie i na zdaroŭje blizkich zusim plavać», — ściardžaje staršynia hramadzkaha abjadnańnia «Razam suprać hiepatytu» Dźmitry Praskuryn, jaki sam pakutavaŭ na hiepatyt S i dva hady tamu pieramoh chvarobu.
28 lipienia — Usiaśvietny dzień baraćby z hiepatytam. Pavodle Ŭsiaśvietnaj arhanizacyi achovy zdaroŭja, hiepatytam infikavanyja 2 miljardy čałaviek u śviecie, to bok kožny treci žychar planety. Štohod ad hiepatytu pamiraje bolš za 600 tysiač čałaviek u śviecie.
Takim čynam pavodle medykaŭ Śmiarotnaść ad hiepatytu pieravyšaje śmiarotnaść ad ŚNIDu.
Pavodle ŭsiaśvietnaj statystyki, prykładna 96% usich vypadkaŭ śmierci prychodzicca na 2 typy hiepatytaŭ: V i S.
Pavodle pradstaŭnika Ŭsiaśvietnaj arhanizacyi achovy zdaroŭja ŭ Biełarusi Batyra Bierdykłyčava, u 2015 hodzie 257 miljonaŭ čałaviek žyli z chraničnaj infekcyjaj hiepatytu V i 71 miljon čałaviek — z hiepatytam S:
«Dla paraŭnańnia: ź VIČ u śviecie žyvie 37 miljonaŭ. To bok maštaby pošaści virusnaha hiepatytu značna bolšyja. Śmiarotnaść ad hiepatytu paraŭnalnaja ź śmiarotnaściu ad suchotaŭ i pieravyšaje śmiarotnaść ad ŚNIDu.
Asnoŭny barjer u lačeńni hiepatytu ŭ mnohich krainach śvietu — cana preparataŭ», — kaža spadar Bierdykłyčaŭ.
Na hiepatyt A letaś zachvareli 77 čałaviek, balšynia virus pryviezła z Azii
Iryna Hlinskaja.
U Biełarusi virusnyja hiepatyty A i E ciapier sustrakajucca davoli redka. Letaś na hiepatyt A zachvareli 77 čałaviek, čaściej za ŭsio infekcyju ludzi «padchapili» za miežami Biełarusi, u azijackich dziaržavach — Tadžykistanie, Turkmenistanie, Turcyi, Ehipcie. Jašče ŭ 1980-ja hady štohod na hiepatyt A chvareli bolš za 1 tysiaču čałaviek, raspaviała namieśnica hałoŭnaha doktara pa epidemijalohii Respublikanskaha centru hihijeny Iryna Hlinskaja.
Zachvorvalnaść na hiepatyt A — mieniej za 1 vypadak na 100 tysiač nasielnictva.
«Pieravažny šlach pieradačy hiepatytaŭ V i S — połavy»
Druhaja hrupa infekcyjaŭ — parenteralnyja virusnyja hiepatyty V i S. Tut zusim inšy mechanizm pieradačy infekcyi. Uzbudžalnik u pieršuju čarhu znachodzicca ŭ kryvi i spermavahinalnaj vadkaści, tłumačyć Iryna Hlinskaja:
«Pieravažny šlach pieradačy hiepatytaŭ V i S — połavy, nieabaronienyja połavyja kantakty. 10—11% — niemedyčnyja manipulacyi (manikiur, pirsinh, tatu); 10% — unutryviennaje ŭviadzieńnie narkotykaŭ; 5% — kantaktna-pobytavy ŭzrovień. Naprykład, kali ŭ siamji jość zaražany infekcyjaj, jon ukałoŭsia ihołkaj, ranu apracavaŭ, a na končyku ihołki zastaŭsia virus hiepatytu V, jaki vielmi žyvučy — da 6 miesiacaŭ».
Lekary rekamendujuć vakcynacyju, asabliva kali siarod blizkich jość ludzi, zaražanyja virusam hiepatytu. Na siońnia bolšaść maładych ludziej va ŭzroście da 25 hadoŭ pryščeplenyja ad hiepatytu V. Ale niekatoryja baćki praciviacca, nia chočuć pryščeplivać dzietak. A ŭ dziaciej zachvorvańnie pierachodzić u chraničnuju formu ŭ 50—90% vypadkaŭ. U darosłych — tolki ŭ 10% vypadkaŭ.
U Biełarusi 33 tysiačy chvorych na hiepatyt S
Virusny hiepatyt S, niahledziačy na istotnaje źnižeńnie kolkaści zachvarełych, pa-raniejšamu vielmi niepakoić medykaŭ. Hiepatyt S niebiaśpiečny hiepatacelularnaj karcynomaj i cyrozam piačonki. Da paŭtara tysiač čałaviek pamiraje štohod ad takich chvarobaŭ u Biełarusi. Tamu statystyka śmiarotnaści ad hiepatytu źviazanaja mienavita z hetymi patalohijami, patłumačyŭ hałoŭny pazaštatny infekcyjanist Ministerstva achovy zdaroŭja Ihar Karpaŭ.
Ihar Karpaŭ.
«Kolkaść pacyjentaŭ usio jašče značnaja. U 1996 hodzie, kali pravodziłasia pieršaje ŭ krainie daśledavańnie, było 48 tysiačaŭ stanoŭčych probaŭ na hiepatyt S. Ciapier u Biełarusi prykładna 33 tysiačaŭ pacyjentaŭ stajać na ŭliku z chraničnym virusnym hiepatytam S.
U apošnija 2—3 hady my dasiahnuli praryvu ŭ lačeńni peŭnych virusnych hiepatytaŭ. I dyjahnastyčnyja, i lekavalnyja mahčymaści istotna palepšylisia. H. zn. źmianilisia i padychody, i dastupnaść lekavańnia. Źjavilisia preparaty, jakija dazvalajuć kantralavać virusnaje abciažarańnie čałavieka. Metodyki dastupnyja, i ŭ rajonach pacyjentam z HBS+taksama možna prajści analizy», — zapeŭniŭ hałoŭny pazaštatny infekcyjanist Ministerstva achovy zdaroŭja Ihar Karpaŭ.
Biełaruś vyrablaje efektyŭnyja analahi lekaŭ suprać hiepatytu
Jašče 3 hady tamu ŭ tak zvanych «hiepatyt-forumach» na sajcie «Razam suprać hiepatytu» chvoryja pisali, što najbolš pašyranaj terapijaj byŭ pehilavany interferon u spałučeńni z rybavirynam. I standartny kurs lačeńnia na 1 hod kaštavaŭ 13 tysiač dalaraŭ. Cana bolš sučasnaj trochkampanentavaj schiemy lačeńnia dachodziła da 55 tysiačaŭ dalaraŭ.
Ciapier sytuacyja źmianiłasia, zapeŭniŭ hałoŭny infekcyjanist Ihar Karpaŭ:
«Pytańni, źviazanyja ź interferonam, pierastali być aktualnymi. Interferon pacyjenty nia chočuć užyvać, bo źjavilisia bolš efektyŭnyja preparaty naŭprostavaha dziejańnia. Ceny vielmi adroźnivajucca. Aryhinalnyja leki vytvorčaści Kanady, Niamieččyny, ZŠA, naturalna, kaštujuć doraha. Ale źjavilisia preparaty-hieneryki, analahi. Ajčynnyja preparaty naŭprostavaha dziejańnia kaštujuć značna mienš. Da prykładu, 404 rubli kaštuje ajčynny hiepasoft (Asnoŭnaje lekavaje rečyva —safasbuvir ehipieckaj vytvorčaści, hiepasoft vyrablaje zamiežnaje pradpryjemstva «Reb-pharma». — RS).
U roznych krainach ceny roznyja, i supastaŭlać ich nia treba. Kožnaja dziaržava namahajecca źnizić canu dla svaich hramadzianaŭ. Isnuje jašče patentavaje prava, i zaraz viaducca pieramovy, kab vyrablać u Biełarusi jašče niekalkich efektyŭnych lekaŭ. Spadziajusia, uvieś hety spektar preparataŭ budzie mieć ceny, dastupnyja dla chvorych na hiepatyt».
Hiepatyt S na 100% vylečvajecca
U Biełarusi dahetul niama dziaržaŭnaj prahramy baraćby z hiepatytam. Havorka pra jaje idzie ŭžo hadoŭ piać, prajekt byccam padrychtavany, ale prahrama dahetul nie pryniataja. Chacia sytuacyja z hiepatytam značna palepšyłasia, śćviardžaje staršynia hramadzkaha abjadnańnia «Razam suprać hiepatytu» Dźmitry Praskuryn:
«7 hadoŭ tamu my stvaryli hramadzkaje abjadnańnie «Razam suprać hiepatytu», bo prablemaŭ było vielmi šmat, leki byli vielmi darahija i amal niedastupnyja. My abivali parohi Ministerstva achovy zdaroŭja, patrabavali: «Rabicie leki!» I zruchi vidavočnyja. U paraŭnańni z sytuacyjaj 3 hady tamu — heta nieba i ziamla. I pa cenach, i pa vybary preparataŭ.
Raniej byli tolki pehilavanyja interferony, jakija kaštavali da 10 tysiačaŭ dalaraŭ za kurs lačeńnia. Ciapier heta adnosna niadoraha. I vylečvajecca hiepatyt S na 100%.
Na pačatku červienia Ministerstva achovy zdaroŭja razdało 500 pacyjentam 1500 upakovak aryhinalnaha kanadzkaha preparatu safasbuvir na poŭny kurs lačeńnia. Leki atrymali ludzi, jakija znachodzilisia ŭ ciažkim stanie, a taksama medyki, jakija chvarejuć. Pry kancy žniŭnia čakajecca jašče adzin taki etap.
Kali raniej my pravodzili «škoły hiepatytu», źbirali pa 50—100 čałaviek, dzie ludzi dzialilisia svaimi historyjami, prablemami, pieražyvańniami, to ciapier hetaha niama. Ja nie śpiavaju dyfirambaŭ Ministerstvu achovy zdaroŭja, ale sprava zroblena. Moža, i my ŭ niečym spryčynilisia, bo ich tarmasili. Ale vynik jość. Nia vylečyŭ hiepatyt ciapier toj, chto albo jaho nie adčuvaje i nie dyjahnastavaŭ, albo toj, kamu na siabie i na zdaroŭje blizkich zusim naplavać.
Chaciełasia b bačyć Biełaruś u liku krainaŭ z raźvitaj farmaceŭtyčnaj pramysłovaściu, kab tut roznyja novyja preparaty vyrablalisia. Kab my nie adstavali», — vykazaŭ nadzieju Dźmitry Praskuryn.
