U Minsku ruch tramvajaŭ u kirunku čyhunačnaha vakzała byŭ pierakryty jašče ŭ pačatku 2015 hoda. Budoŭla zaciahnułasia na dva z pałovaj hady. Tramvai płanujuć zapuścić ad pačatku vieraśnia.
Adnak kali ramont učastka na vulicy Čapajeva ad Kazłova da Biaduli budzie skončany całkam, to na Pieršamajskaj i Uljanaŭskaj inžyniernyja bryhady praviaduć tolki prafiłaktyčnyja pracy, bo rejki praciahły čas zusim nie ekspłuatavalisia.
Fota Siarhieja Hudzilina.
Realnaj madernizacyjaj bolš čym trochkiłamietrovaha ŭčastka tramvajnych šlachoŭ na vulicach Pieršamajskaj, Uljanaŭskaj i Babrujskaj da razvarotnaha kalca kala płoščy Miaśnikova «Minsktrans» płanuje zaniacca tolki ŭ 2018 hodzie.
Čamu nielha było zrabić hetaha raniej, pakul šlachi stajali pustymi?
«Naša Niva» atrymała adkaz za podpisam hienieralnaha dyrektara «Minsktransa» Lavoncija Papianka. Hałoŭnaj pryčynaj biaździejnaści jon nazyvaje toje, što pakul jašče nie realizavany prajekt, zhodna ź jakim budzie źmianiacca infrastruktura ŭ kvartale vulic Uljanaŭskaja, Śviardłova, Kirava, a taksama pašyreńnie Uljanaŭskaj.
Niama pieršaha — niama i druhoha. Tamu, jak adznačyŭ u kamientary «Našaj Nivie» hałoŭny inžynier «Minsktransa» Viktar Staravieraŭ, hałoŭnaje — «padaryć horadu śviata i pryhoža adkryć tramvajny ruch 1 vieraśnia». Što budzie dalej — budzie bačna paśla.
U kułuarach pradpryjemstva vykazali zdahadku, što, chutčej za ŭsio, na poŭnuju rekanstrukcyju zapłanavanaha banalna nie chapiła hrošaŭ: u 2018 hodzie biudžetnyja srodki i inšaje finansavańnie budzie raźmiarkoŭvacca pa novaj.
