Biełaruski aficyjny lider vydaŭ svajo nieciarplivaje čakańnie choć niejkaha zachodniaha piernika. "U adkaz na ščyraje žadańnie Biełarusi narmalizavać dačynieńni z Zachadam, sa Złučanymi Štatami, na našy kankretnyja zachady ni Eŭraźviaz, ni ZŠA z adekvatnymi mierami śpiašacca nie źbirajucca", — zaznačyŭ Łukašenka 29 žniŭnia padčas kadravych pryznačeńniaŭ u siłavych viedamstvach.
Cikava, jakija adekvatnyja zachady mohuć być? Vypuścić viaźniaŭ Huantanama? :)
Kali ž surjozna, to nieciarplivaść možna zrazumieć: ciažka doŭha tryvać u špahacie, jak nazvaŭ ciapierašni etap biełaruskaj "šmatvektarnaści" palitolah Rar.
Rasieja ciarebić, kab Miensk pryznaŭ dziaržavami miaciežnyja hruzinskija pravincyi.
Palijatyŭnaja zajava ad 28 žniŭnia: kaleha Miadźviedzieŭ, my vas maralna padtrymlivajem i ŭsio takoje — Maskvu, kaniečnie ž, nie padmanuła.
"Łukašenka ŭvilnuŭ ad pryznańnia Abchazii dy Paŭdzionnaj Asetyi", — vynieśli verdykt prakramloŭskija "Iźviestija".
Pryznać tyja miaciežnyja terytoryi na fonie maŭčańnia inšych dziaržaŭ SND (nia kažučy ŭžo pra astatni śviet) — samo pa sabie, miakka kažučy, niavyjhryšna. Ale heta jašče možna było b niejak pieražyć (u rešcie reštaŭ, pra kaŭkaskija spravy ŭ 12 umovach Eŭraźviazu niama ni słova). Adnak ža dla biełaruskaha kiraŭnictva padrychtavana i nastupnaja, jašče horšaja pastka. Pavał Baradzin abiacaje vypić try litry, kali Abchazija z Paŭdzionnaj Asetyjaj buduć pryniatyja ŭ sajuznuju dziaržavu. Biełaruskamu ž kiraŭnictvu ŭ takim razie lepiej vypić atruty.
Ujaviecie sabie Najvyšejšuju dziaržradu, dzie pa ŭsich pytańniach raskład hałasoŭ 3:1 na karyść Kramla. Tušy śviatło!
Miž tym pa siońniašnich replikach aficyjnaha biełaruskaha kiraŭnika možna ŭskosna mierkavać, što ni emisar dziarždepu Merkieł, ni pasłaniec Eŭrakamisii Minhareli ŭ Miensku abiacankami nadta nia sypali. I najpierš pastavili ŭmovaj demakratyčnyja vybary. Nu a jakija jany buduć demakratyčnyja, my z vami ŭžo dastatkova vyrazna ŭjaŭlajem.
Takim čynam, u pavietry łunajuć niekalki vostrych pytańniaŭ. Ci daciśnie Maskva raniej, čym Zachad saśpieje dla vydačy piernika? Ci nia "zdaść" Zachad, u svaju čarhu, apazycyju, śpiašajučysia navieści masty ź Biełaruśsiu, pakul jana nia stała rasiejskaj pravincyjaj? Narešcie, ci nie sapsuje malinu sama apazycyja, pa-dziciačamu tupajučy nožkaj, što jaje nie prymajuć u dyjaloh?
Palityčny ahladalnik Raman Jakaŭleŭski ličyć, što ŭ Łukašenki nadta mała času. "Maskva voś-voś daciśnie, i hety impet adčuvajecca pa zajavach ambasadara Surykava. Havorka nia tolki ab pryznańni tych respublik, ale ŭvohule ab nakidańni rasiejskaha chamuta: "asymetryčny adkaz" na SRA i hetak dalej. Miž tym Eŭraźviaz, nahadaju, składajecca z 27 krain. Tam niaprosta jak pryniać niejkaje rašeńnie, tak i skasavać. Biełaruski režym niamała pastaraŭsia ŭ svoj čas, kab nažyć tyja sankcyi, i zaraz nia varta spadziavacca na niejki imhnienny cud…".
Na dumku Jakaŭleŭskaha, Łukašenku mohuć zmusić da pryznańnia miaciežnych pravincyj užo na samicie ADKB 5 vieraśnia. Ci, kali chočacie, u kuluarach toha samitu.
Sa svajho boku, palitolah Andrej Fiodaraŭ miarkuje, što etapnym dla dalejšaha losu stasunkaŭ miž Mienskam i Zachadam stanie vynik vybaraŭ u Pałatu. "Zachad tut pierad ciažkoj dylemaj, — kaža Fiodaraŭ. — Z adnaho boku, vybary, zrazumieła, buduć daloka nia ŭzornyja. Ź inšaha — jość realnaja niebiaśpieka dla niezaležnaści Biełarusi. A kali idziecca pra našu niezaležnaść, maksymalizm Zachadu ŭ biełaruskim pytańni moža być mieniej karysny, čym peŭnaja hnutkaść".
