Vykanańnie ŭsich punktaŭ minskich pahadnieńniaŭ źjaŭlajecca asnoŭnaj umovaj admieny sankcyj u dačynieńni da Rasii. Pra heta fiederalny kancler Hiermanii Anhieła Mierkiel zajaviła ŭ paniadziełak, 29 žniŭnia, padčas tradycyjnaj letniaj pres-kanfierencyi, paviedamlaje DW.
«Sankcyi ŭ dačynieńni da Rasii buduć źniatyja, kali ŭ ich bolš nie budzie nieabchodnaści. My chočam znajści rašeńnie kanfliktu ŭ ramkach «narmandskaha farmatu». Kali my zmožam realizavać paradak minskich damoŭlenaściej, źjaviacca dobryja šancy dla admieny sankcyj», — adznačyła kiraŭnik niamieckaha ŭrada.
Mierkiel nahadała, što bakam kanfliktu ŭdałosia damovicca ab zachavańni režymu spynieńnia ahniu da pačatku navučalnaha hoda. Pry hetym pazicyja fiederalnaha kanclera pa pytańni anieksii Kryma zastałasia niaźmiennaj.
Fiederalny kancler nie zhodnaja sa śćviardžeńniami, što ŭ apošni čas u jaje dziejańniach nazirajecca adychod ad palityki haścinnaści ŭ dačynieńni da biežancaŭ. Kroki, nakiravanyja suprać kantrabandystaŭ, jakija pierapraŭlajuć biežancaŭ u Jeŭropu, stvareńnie centraŭ raźmiaščeńnia ŭ Livii i dapamoha hetaj krainie ŭ raźvićci «ŭzychodziać da duchu» dapamohi mihrantam letam 2015 hoda, zaznačyła Mierkiel. Pry hetym svajo rašeńnie adkryć miežy dla ŭciekačoŭ jana ličyć važnym i pravilnym va ŭmovach nadzvyčajnaj humanitarnaj situacyi, jakaja tady skłałasia.
Ale ciapier, pa jaje słovach, nastaŭ čas pošuku doŭhačasovych rašeńniaŭ. Jeŭrapiejcy zmohuć tolki tady žyć u biaśpiecy i kamforcie, «kali my pačniom hladzieć dalej za ŭłasny nos i zojmiemsia ekanamičnym raźvićciom našych susiedziaŭ», — padkreśliła Mierkiel. Pry hetym jana znoŭ raskrytykavała tyja krainy Jeŭrasajuza, jakija vystupajuć suprać «spraviadlivaha raźmierkavańnia» biežancaŭ. Takija krainy, jak Italija i Hrecyja, na jakija siońnia prypadaje asnoŭny patok biežancaŭ i nielehalnych mihrantaŭ, nie mohuć zastavacca sam-nasam z hetaj prablemaj, adznačyła kiraŭnik niamieckaha ŭrada.
Drukujecca ŭ miežach śpiecyjalnaj rubryki «Naviny Hiermanii»
