Minčanin na vačach u susiedziaŭ zakałoŭ viłami kaciania i zakapaŭ jaho jašče žyvym. Šakavanyja vidavočcy vyklikali milicyju. Niaščasnuju žyviolinku dastali na śviatło i advieźli ŭ vietkliniku, adnak było ŭžo pozna… Papiaredni dyjahnaz — pierałom pazvanočnika, unutrany kryvaciok, udar unutranych orhanaŭ. Žudasnaje zdareńnie apisvaje sajt sb.by.
— U subotu ja čakaŭ znajomaha, tamu paziraŭ u akno druhoha paviercha na kalcavuju, — Hienadź, žychar vulicy Rasonskaj vioski Cna, prykmietna chvalujecca, dahetul pieražyvaje toje, što zdaryłasia. — Ubačyŭ, jak svajak susieda pa katedžnym pasiołku zajšoŭ u chleŭ ź viłami. A kali vyjšaŭ… na zubcach viłaŭ miaŭkała i kruciłasia maleńkaje rudoje kacianiatka. Ja zakryčaŭ: «Što vy robicie?!» Nie źviartajučy na mianie ŭvahi, susied adnios kaciania da miažy ŭčastka, skinuŭ na ziamlu, potym schadziŭ pa rydloŭku i zakapaŭ.
Hienadź vyklikaŭ milicyju. Supracoŭniki Savieckaha RUUS Minska prymusili susieda adkapać žyviołu. Kaciania jašče dychała i miaŭkała. Jaho pakłali na hanak. Pa patrabavańni Hienadzia žyviołu advieźli ŭ vieterynarnuju kliniku, adnak vyratavać jaho nie ŭdałosia.
Vieterynar zrabiŭ fatahrafii niaščasnaj žyviolinki i pieradaŭ ich supracoŭnikam milicyi. Jon zapeŭniŭ taksama, što da zabojstva kaciania było absalutna zdarovym.
Pa słovach Hienadzia, čałaviek, jaki tak žorstka raspraviŭsia z žyviołaj, nie adčuvaŭ nijakaha raskajańnia — naadvarot, braviravaŭ svoj učynak i navat pahražaŭ jamu. Pahrozy pastupajuć i ciapier, tamu mužčyna byŭ vymušany źviarnucca ŭ milicyju ź jašče adnoj zajavaj.
— Materyjały pravierki pa fakcie žorstkaha abychodžańnia z žyviołaj znachodziacca ŭ RUUS Savieckaha rajona. Pa vynikach jaje budzie dadziena pravavaja acenka dziejańniam mužčyny, — koratka adkazała Alaksandra Papova, aficyjny pradstaŭnik HUUS Minharvykankama.
— Adkaznaść za žorstkaje abychodžańnie z žyviołami praduhledžanaja Administracyjnym i Kryminalnym kodeksami. Dla kryminalnaj adkaznaści nieabchodna najaŭnaść adnoj z čatyroch prykmiet: chulihanskija abo haniebnyja matyvy, karyślivyja mety, a taksama ŭčynieńnie złačynstva ŭ prysutnaści zaviedama małaletnich, — rastłumačyŭ Jaŭhienija Kabakova, advakat śpiecyjalizavanaj jurydyčnaj kansultacyi № 2 MDAK. — Kali ni adna z hetych prykmiet nie budzie ŭhledžana, nastupić administracyjnaja adkaznaść, jakaja ciahnie nakładańnie štrafu ad 10 da 30 bazavych vieličyń abo administracyjny aryšt.
