Achviarami terakta ŭ punkcie zboru ŭciekačoŭ kala Dejr-ez-Zora ŭ Siryi stali bolš za 100 čałaviek. Pra heta paviedamlajuć siryjskija ŚMI.
Dejr-ez-Zor — centr adnoj z pravincyj na paŭnočnym uschodzie Siryi. Siły, viernyja ŭradu Asada, vytrymali ŭ im trochhadovuju abłohu bajevikoŭ Isłamskaj dziaržavy.
Pra poŭny praryŭ błakady i vyzvaleńnie horada Rasija i Damask abviaścili dva dni nazad. Nastup u kirunku Dejr-ez-Zora pravodzili supolna siły Asada, rasijski korpus i prairanskija farmiravańni.
U 2012 hodzie častku horada zachapili antyasadaŭskija paŭstancy. U 2014 hodzie ich vyciaśniła Isłamskaja dziaržava. Asadaŭcy trymali pad svaim kantrolem vajskovaje lotnišča i prykładna 40% terytoryi horada vakoł jaho. Dziakujučy tamu, što spačatku partyzany, a paśla isłamisty nie mieli procipavietranych rakiet, uradu ŭdavałasia zabiaśpiečvać harnizon horada pavietranym mostam.
U Dejr-ez-Zory mieściacca asnoŭnyja radoviščy siryjskaj nafty. Uradlivaja dalina Jeŭfrata vykarystoŭvajecca dla sielskaj haspadarki.
Zaciatyja bai ŭ pravincyi Dejr-ez-Zor praciahvalisia ŭvieś 2017 hod. Pra stupień ich intensiŭnaści śviedčyć toj fakt, što ŭ ich zahinuŭ kamandzir «rasijskich vajennych daradcaŭ» u Siryi hienierał-lejtenant Valeryj Asapaŭ.
Pa stanie na pieršyja dni listapada pravy bierah Jeŭfrata zaniali siryjskija ŭradavyja i rasijskija vojski, a levy — Siryjskija demakratyčnyja siły, jakich padtrymlivajuć amierykancy.