Biełaruskimi pravaachoŭnymi orhanami zatrymany namieśnik hałoŭnaha inžyniera pa padrychtoŭcy mietałurhičnaj vytvorčaści — hałoŭny mietałurh MTZ Andrej Karaś i jašče niekalki supracoŭnikaŭ traktarnaha zavoda. Pra heta TUT.BY paviedamili dźvie nie źviazanyja adna z adnoj krynicy.
«Na zavodzie zatrymali hrupu ź niekalkich čałaviek, jakija za adpaviednaje ŭznaharodžańnie kuplali liciejnyja materyjały. Hrupa dziejničała daŭno. Pry hetym jakaść syraviny časam vyklikała pytańni», — skazaŭ surazmoŭca. Pavodle jaho słoŭ, adnym z zatrymanych źjaŭlajecca hałoŭny mietałurh MTZ Andrej Karaś.
Jašče adna krynica skazała, što padziei na MTZ — heta praciah historyi z zatrymańniem ukrainskaha top-mieniedžara. «Adny patrabavali [adkat], inšyja davali», — skazaŭ jon.
Na MTZ skazali, što z 21 listapada abaviazki hałoŭnaha mietałurha zavoda vykonvaje inšy čałaviek. Ab miescaznachodžańni Andreja Karasia na zavodzie ničoha nieviadoma.
Tydzień tamu ŭkrainskija ŚMI paviedamili pra zatrymańnie ŭ Minsku dyrektara «Zavoda uciažarvalnikaŭ» (Kanstancinaŭka, Danieckaja vobłaść) Alaksandra Skiby.
Va ŭkrainskaha pradpryjemstva była zaklučana damova z MTZ na pastaŭku pradukcyi, jakaja vykarystoŭvajecca ŭ liciejnaj vytvorčaści biełaruskaha zavoda. Skiba prybyŭ na pieramovy na Minski traktarny zavod 15 listapada. Nieŭzabavie jon byŭ zatrymany supracoŭnikami KDB Biełarusi. Pavodle infarmacyi, jakaja jość u pasła Ukrainy ŭ Biełarusi, dyrektaru ŭkrainskaha zavoda inkryminujuć daču chabaru.
«Zavod uciažarvalnikaŭ» vyrablaje sypučyja materyjały, jakija prymianiajucca ŭ liciejnaj vytvorčaści dla vytvorčaści farmovačnych, cełasnych i supraćpryharnych pakryćciaŭ.
Atrymać kamientar u KDB nie ŭdałosia.
