U sutyknieńniach arabaŭ ź izrailskaj armijaj ŭ siektary Haza, na Zachodnim bierazie raki Iardan i va ŭschodniaj častcy Jerusalima paciarpieli kala 245 čałaviek. Pra heta paviedamlaje The Times of Israel sa spasyłkaj na zajavu paleścinskaha adździaleńnia Tavarystva Čyrvonaha Paŭmiesiaca.
Fota AFP
Pavodle źviestak miedykaŭ, u sutyknieńniach na Zachodnim bierazie raki Iardan i ŭ samym Jerusalimie, jakija vyklikała rašeńnie prezidenta ZŠA Donalda Trampa pryznać Jerusalim stalicaj Izraila, paciarpieli 217 čałaviek, paviedamlaje RBK.
Ź ich 45 čałaviek byli traŭmavanyja humovymi kulami, jašče 162 trapili pad dziejańnie ślezaciečnaha hazu. Taksama 15 čałaviek paciarpieli ŭ siektary Haza. Siarod paciarpiełych jość i tyja, što atrymali ahniastrelnyja ranieńni. Ministerstva achovy zdaroŭja Paleściny taksama paviedamiła pra dvuch zahinułych padčas kanfliktu.
Pakul viadomaje imia tolki adnaho ź ich. Heta 30-hadovy Machmud al-Masry. Jon zahinuŭ ad ahniastrelnaha ranieńnia ŭ horadzie Chan-Junis ŭ siektary Haza.
Niekatoryja z demanstrantaŭ vyjšli na akcyju z transparantami «Al-Kuds [arabskaja nazva Jerusalima] — stalica Paleściny» i «Dałoŭ Trampa». Udzielniki akcyj kidajuć kamiani i «kaktejli Mołatava» ŭ izrailskich sałdat. U adkaz izrailskija siły ŭžyvajuć ślezaciečny haz i humovyja kuli. Jak piša Haaretz, u šerahu vypadkaŭ vajskoŭcy byli vymušanyja prymianić bajavuju zbroju.
