Suśvietnaja baksiorskaja asacyjacyja ŭchvaliła miesca i dzień praviadzieńnia boja za vakantny čempijonski tytuł WBA u pieršaj paŭsiaredniaj vazie (da 63,3 kh).
Za jaho paspračajucca biełarus Kirył Relich (21-2, 19 nakaŭtaŭ) i kubiniec Ranses Bartelemi (26-0, 13 nakaŭtaŭ), boj adbudziecca 10 lutaha ŭ San-Antonia, ZŠA.
Na siońnia kubiniec pieršy ŭ rejtynhu WBA, Relich — druhi.
Heta budzie ŭžo druhaja sproba biełarusa zavajavać pojas: letaś Relich u vielmi sprečnym bai nie zdoleŭ adabrać tytuł u čempijona Ryki Biornsa, choć nie tolki pierabiŭ jaho pa kolkaści ŭdaraŭ, ale i adpraviŭ na padłohu.
Zrešty, ekśpierty syšlisia na dumcy, što adabrać pojas u brytanca pry sudździach-brytancach i bai ŭ Brytanii niemahčyma, kali tolki nie pieramahać nakaŭtam.
Čempijon Ryki Biorns bolšaść boju ŭciakaŭ ad Relicha, a potym uvohule apynuŭsia na padłozie, ale pieramohu padaryli jamu. Fota skysports.com
Potym u Relicha byŭ kankurentny boj z tym samym kubincam Bartelemi. U adnym z apošnim raundaŭ Relich prosta źbivaŭ svajho apanienta, ale refiery vyratavaŭ kubinca, biez daj pryčyny pačaŭšy adlik nakdaŭna, chacia Bartelemi zastavaŭsia na nahach.
U vyniku, i tady pieramohu nie addali biełarusu, paśla čaho vyšejšaje kiraŭnictva WBA pastanaviła, što sudziejskaje rašeńnie źjaŭlajecca niekarektnym, i byŭ pryznačany revanš, jaki i vyrašyć, chto stanie čempijonam.
Frahmient pieršaha boju Relich — Bartelemi.
Kirył Relich pachodzić z Baranavič, doŭhi čas jon treniravaŭsia ŭ minskaha śpiecyjalista Siarhieja Pytaleva, potym pierajšoŭ da kolišniaj zorki, a ciapier treniera Ryki Chatana.
