Ministr nacyjanalnaj abarony Polščy Antoni Maciarevič paviedamiŭ ab pierakidcy da ŭschodniaj miažy najlepšych tankaŭ, jakija jość na ŭzbrajeńni — Leopard 2A5, paviedamlaje Tut.by sa spasyłkaj na infarmacyjny telekanał TVP Info.
20 śniežnia zaviaršyłasia farmiravańnie tankavaha bataljona 1-j Varšaŭskaj tankavaj bryhady, jakaja ciapier znachodzicca ŭ nasielenym punkcie Viesoła, raźmieščanym prykładna za 189 km ad Bresta.
Padraździaleńnie było ŭkamplektavana 58 tankami: 44 Leopard 2A5 i 14 Leopard 2A4, jakija raniej uvachodzili ŭ skład 34-j broniekavaleryjskaj bryhady z Žahani. Uzamien padraździaleńnie, što dysłakavalisia na zachodnich miežach, atrymała tanki T-72.
Taksama Antonij Maciarevič raspavioŭ ab pačatku farmiravańnia druhoha tankavaha bataljona, jaki taksama budzie kamplektavacca tankami Leopard 2.
Asnaščeńnie armiejskaha padraździaleńnia tankami pravodzicca ŭ ramkach maštabnaha płana ŭzmacnieńnia ŭschodnich rubiažoŭ Polščy. Jon byŭ sfarmulavany na asnovie praviedzienaha ŭ hetym hodzie «Stratehičnaha abaronnaha ahladu», jaki praduhledžvaje sumiesnuju abaronu z sajuźnikami, kali praciŭnik budzie pretendavać na jakuju-niebudź častku polskaj terytoryi.
Paśla rearhanizacyi 1-j tankavaj bryhady ŭ jaje składzie budzie dva tankavyja bataljony, dva miechanizavanyja, artyleryjski dyvizijon i dyvizijon supraćpavietranaj abarony. Usiaho ŭ strai budzie 116 tankaŭ, vialikaja častka ź jakich - Leopard 2A5. Hetyja mašyny adroźnivajucca uzmocnienaj łabavoj branioj, zdolnaj vytrymlivać nieadnarazovaje trapleńnie snaradaŭ kalibra 125 mm. Tank moža raźvivać chutkaść da 72 km/h pa šašy i vałodaje zapasam chodu ŭ 550 km.
