Śviatkavańnie na vostravie praciahvałasia da ranicy.
U Novaj Ziełandyi kampanija ludziej śpiecyjalna nasypała vostraŭ u prybiarežnych vodach, kab adśviatkavać Novy hod na śviežym pavietry i abyści zabaronu na raśpićcio ałkaholu ŭ hramadskich miescach.
Jak paviedamili miascovyja ŚMI, vostraŭ źjaviŭsia ŭ niadzielu dniom padčas adlivu ŭ vuści raki Tajrua kala paŭvostrava Karamandeł.
Na im pastavili stoł i skryniu ź lodam dla astudžeńnia napojaŭ. Padčas prylivu pahorak atačyła vada, i prysutnyja pačali žartavać, što ciapier jany znachodziacca ŭ «mižnarodnych vodach» i, takim čynam, nie abaviazanyja trymacca aficyjnaj zabarony na raśpićcio śpirtnoha.
Jak paviedamlaje novaziełandski sajt stuff.co.nz, hrupa adpačyvalnikaŭ praviała na astraŭku usiu navahodniuju noč, pakinuŭšy vostraŭ u paniadziełak ranicaj.
Ułady susiedniaha horada Karamandeł uviali zabaronu na ŭžyvańnie śpirtnoha ŭ hramadskich miescach u navahodnija śviaty, i za jaje parušeńnie praduhledžany štraf u pamiery 180 dalaraŭ ZŠA abo aryšt.
Adnak na hetuju kreatyŭnuju inicyjatyvu ŭłady adreahavali z humaram. «Aryhinalnaja ideja — kali b ja byŭ u kursie, moža być, i sam by da ich dałučyŭsia», — zajaviŭ načalnik miascovaj palicyi inśpiektar Džon Keli, kali daviedaŭsia pra nasypny vostraŭ.
