Maładafrontaviec Źmicier Daškievič, błohiery Eduard Palčys i Staś Karpaŭ, aktyvist «Dziei» Piatro Markiełaŭ i dyzajnier Alaksandr Čabataroŭ pryjšli ŭ novaadkryty barbieršop «Čekist», kab parazmaŭlać ź jaho zasnavalnikami pra nazvu ŭstanovy.
Aleh Kot, jaki napiaredadni abiacaŭ raźbić hałovy ŭsim, chto krytykuje «Čekista», byŭ dastatkova łahodny. Udzielniki pierformansa źbiralisia paviesić płakat Čabatorava ab padziejach 1937 hoda. Adnak Kot sarvaŭ jaho sa ściany, źmiaŭ i vykinuŭ.
Zrešty, namieraŭ bicca ŭ jaho nie było. Kali Palčys sprabavaŭ raskazać pra achviaraŭ čekistaŭ, to adkaz byŭ karotki: «Nie treba nas vučyć marali».
Niekalki nastupnych sprobaŭ paviesić u barbiery płakat pośpiecham taksama nie skančvalisia. Kožny raz cyrulniki jaho zryvali. Eduard Palčys prapanavaŭ chłopcam źmianić nazvu ŭstanovy. Maŭlaŭ, tady zładzim taki biaspłatny pijar, što ad klijentaŭ adboju nie budzie.
Sam rajon na vulicy Cimirazieva, dzie adkryłasia cyrulnia, nie samy šmatludny. Cikava, ci jość tam patencyjał dla paŭnavartasnaj pracy takoj ustanovy. Zrešty, nad hałavoj adnaho naviedvalnika šamanili ŭ toj samy momant, kali pryjšli aktyvisty, a druhi čakaŭ svajoj čarhi.
Kali Aleh Kot prapanavaŭ Źmitru Daškieviču pastryhčysia dy spakojna parazmaŭlać adzin na adzin, to Źmicier admoviŭsia. Kaža, što pakul jahonyja pierakanańni karystacca pasłuhami «Čekista» nie dazvalajuć. Uładalnikam prapanavali zapuścić hałasavańnie ŭ internecie adnosna novaj nazvy. Kot paabiacaŭ padumać nad takoj prapanovaj.
Kali prapanavali nazvu «Zianon», to ŭłaśnik prosta skazaŭ: «Davajcie hrošy, adkryjem vam i Zianona».
