U śniežni 2017 hoda stała viadoma, što amierykanskaja kampanija Mapbox nabyła biełaruskuju MapData, jakaja pracuje nad kartahrafičnymi siervisami. MapData stała čarhovaj biełaruskaj kampanijaj, jakaja była vykuplena amierykanskaj jurydyčnaj asobaj — raniej padobnaje zdaryłasia z AI Matter Juryja Mielničaka i Juryja Hurskaha.
Na svajoj staroncy ŭ Fiejsbuku Juryj Mielničak krasamoŭna napisaŭ pra pośpiech biełaruskaj MapData nastupnym čynam:
Jakim čynam biełaruskaja kampanija dasiahnuła takoha pośpiechu, jakija pierad joj zaraz stajać mety, i jak Biełaruś moža stać rehijanalnym IT-lidaram? Pra ŭsio heta «Našaj Nivie» raspavioŭ kiraŭnik MapData Alaksandr Matviejenka.
Pra supracoŭnictva MapData i Mapbox
Z Mapbox my supracoŭničali davoli daŭno, na momant pahadnieńnia ŭžo paŭtara hoda. My rabili dla ich dadatak dla ściskańnia dadzienych i aptymizacyi ałharytmaŭ. Heta byŭ naš adziny klijent i raboty ź im było dastatkova. Inšych klijentaŭ my nie šukali.
Našy amierykanskija partniory atrymali $164 miljony dalaraŭ ad bujnoha fondu SoftBank Vision. Heta ŭsio supała z našym stałym supracoŭnictvam i tym faktam, što ŭ Biełarusi aktyŭna raźvivajecca supolnaść AI (Artificial Intelligence — štučny intelekt). Usie hetyja faktary zrabili mahčymaj uhodu MapData i Mapbox.
Ale treba adznačyć, što, u adroźnieńnie ad Maps.me i AI Matter, kali hetyja kampanii byli nabytyja Mail.ru i Google, u nas z amierykanskimi partniorami adbyŭsia faktyčna praciah užo isnujučaha supracoŭnictva, prosta na novych umovach.
Ciapier u Minsku na bazie MapData byŭ stvorany navukova-daśledčy centr, dzie ŭžo pracuje 14 čałaviek. Płanujem pavialičyć ich kolkaść da 25.
Alaksandr Matviejenka, fota dev.by
Bieśpiłotny aŭtamabil z dapamohaj niejronnych sietak
Płany ŭ nas napaleonaŭskija: my chočam stvaryć bieśpiłotny aŭtamabil. Dakładniej, prahramnaje zabieśpiačeńnie dla takoha aŭtamabila. Na dadzienym etapie my chočam, kab našy raspracoŭki dazvalali analizavać darožnuju situacyju.
My chočam rabić uvieś cykł našaj raspracoŭki ŭ Biełarusi. Tyja tendencyi, jakija zaraz adbyvajucca ŭ Biełarusi ŭ IT-halinie, dazvalajuć być aptymistami.
Svaim kankurentam my ličym izrailskuju firmu Mobileye, jakuju kampanija Intel nabyła za $15 miljardaŭ. Naša admietnaść u tym, što jany stvarajuć bieśpiłotny aŭtamabil sa zvyčajnych datčykaŭ, a my chočam zrabić toje samaje pry dapamozie niejronnych sietak.
Kampaniju Tesla my nie ličym svaimi kankurentami. Tak, u ich kłasnyja technałohii, ale jany pakidajuć ich tolki sabie. A naša meta — rabić toje ž samaje, što i jany, ale raspaŭsiudžvać heta siarod inšych vytvorcaŭ.
Ale ŭ budučyni našy technałohii možna budzie vykarystoŭvać nie tolki ŭ aŭtamabilach — nakirunkaŭ raźvićcia tut šmat.
Alaksandr Matviejenka, fota dev.by
Ad prodažu resursaŭ da prodažu praduktaŭ
Na moj pohlad, trend u nas źmianiajecca. Kali raniej Biełaruś faktyčna pradavała IT-resursy (dobry prykład tut paśpiachovaja kampanija EPAM), to zaraz my pačynajem pradavać pradukty (takija jak Maps.me i Fabby). Jość nadzieja, što hetamu budzie spryjać i zakanadaŭstva.
U čym važnaść Dekreta №8
Jon admietny tym, što ŭvodzić u Biełaruś elemienty «anhlijskaha prava». Na praktycy heta značyć, što ŭ Biełarusi budzie vyhadna stvarać IT-kampanii, dzie zmohuć pracavać navat nie tolki biełarusy. Jak minimum, my zmožam pryciahvać siudy ludskija resursy z Ukrainy i Rasii.
Ad hetych krain my adroźnivajemsia ŭ lepšy bok. Kali pahladzieć na Rasiju, to zamiežnaje inviestavańnie ŭ ich prajekty niaspynna skaračajecca, a heta nie moža nie strymlivać biźnies. Jany majuć drennyja adnosiny ź Jeŭropaj i ZŠA.
Va Ukrainie ž Słužba biaśpieki Ukrainy mocna «pryciskaje» ajcišnikaŭ. Taksama Ukraina palityčna vielmi niestabilnaja, što nie moža nie ŭpłyvać na biźnies. Tam svaje asablivaści.
Hety dekret časam krytykujuć. Ad hetych krytykaŭ časam možna pačuć razumnyja rečy, ale treba być realistam — niemahčyma adrazu zrabić usio i raspaŭsiudzić takija ŭmovy na ŭsie haliny ekanomiki. Ja dobra razumieju łohiku krytykaŭ dekreta, ale nie padzialaju jaje.
Alaksandr Matviejenka, fota dev.by
Naša pieravaha: u Minsk možna trapić chutka
Da nas u hości pryjazdžaje kiraŭnik Mapbox Eryk Hundersien. Jon apošnim časam prosta ŭ zachapleńni ad taho, nakolki chutka možna trapić u Minsk paśla pryziamleńnia samalota ŭ aeraporcie. Ale prablemnyja momanty, jakija nas abmiažoŭvajuć, zastalisia.
Naprykład, časam jon choča nam dasłać niejkija devajsy pa pošcie. A z hetym u nas potym mohuć uźniknuć prablemy. My pavinny davodzić mytni, što atrymoŭvajem heta nie dla pieraprodažu. Kali heta aparatura, jakaja zapisvaje videa i huk, nam mohuć «pryšyć» jaki-niebudź špijanaž. Ja liču, što heta marazm.
Byŭ vypadak, kali Mapbox dasłaŭ nam karparatyŭnyja majki i nalepki. Ja zhubiŭ ceły dzień, kab davieści, što hetyja 4 ci 5 majek atrymaŭ nie dla prodažu, i što naša kampanija ŭvohule handlem nie zajmajecca!
