Viadomy azierbajdžanski žurnalist Afhan Muchtarły asudžany na šeść hadoŭ źniavoleńja pavodle abvinavačańnia ŭ niezakonnym pierasiačeńni miažy. Kalehi i svajaki śćviardžajuć, što jaho vykrali ŭ Hruzii i vyvieźli ŭ Azierbajdžan.
Sprava Afhana Muchtarły mieła vialiki rezanans u Hruzii, dzie jon znachodziŭsia apošnija dva hady.
Jak paviedamiŭ advakat žurnalista Elčyn Sadyhaŭ, prakuror zapatrabavaŭ dla jaho vaśmi hadoŭ pazbaŭleńnia voli.
«Rašeńnie suda niezakonna, zasnavana na łžyvych abvinavačańniach, i my padadzim apielacyju», — zajaviŭ Sadyhaŭ.
Afhan Muchtarły byŭ pryznany vinavatym u niezakonnym pierasiačeńni miažy, pieravozie kantrabandy (pa dadzienych śledstva, jon mieŭ pry sabie 10 tysiač jeŭra) i supracivie pry zatrymańni.
U svaim apošnim słovie Afhan Muchtarły zajaviŭ, što sud palityčna matyvavany, a sapraŭdnaj pryčynaj pieraśledu źjaŭlajucca jaho artykuły pra karupcyju. Pa słovach žurnalista, jaho vykrali ŭ Tbilisi i vyvieźli ŭ Azierbajdžan.
«Vy mnie nie zmožacie dać apošniaje słova, patrebnyja słovy ja budu pramaŭlać da kanca žyćcia», - zajaviŭ jon.
«Sprava Muchtarły»
Afhan Muchtarły, azierbajdžanski žurnalist, źjechaŭ z Azierbajdžana i dva hady žyŭ u Hruzii.
Asnoŭnaj temaj jaho materyjałaŭ była karupcyja ŭ Azierbajdžanie. Jon pisaŭ u tym liku pra ŭłasnaść azierbajdžanskaha prezidenta Ilchama Alijeva i jaho siamji ŭ Hruzii.
Uviečary 29 maja 2017 hoda jaho žonka Lejła i kalehi zajavili, što Afhan nie vychodzić na suviaź i, mahčyma, jaho vykrali. Na nastupny dzień jon apynuŭsia ŭ Baku.
Muchtarły apošni raz bačyli ŭ centry Tbilisi. Pravaabaroncy, a taksama mnohija palityki ličać, što jaho vykrali ŭ Tbilisi i pieravieźli ŭ Azierbajdžan pry ŭdziele abo papuščalnictvie siłavych struktur abiedźviuch krain.