Za apošnija hady navukoŭcy adkryli dziasiatki roznych harmonaŭ, białkoŭ i inšych rečyvaŭ, pavyšeńnie ci panižeńnie kancentracyi jakich prykmietna padaŭžaje žyćcio myšam i inšym žyviołam. Jaskravym prykładam hetaha źjaŭlajecca białok Klotho, vysokija kancentracyi jakoha nazirajucca ŭ arhaniźmie ludziej-doŭhažycharoŭ.
Jak raspaviadaje Musa Machamadzi, adzin z daśledčykaŭ, pryncypy raboty Klotho dahetul zastavalisia tajamnicaj dla malekularnych bijołahaŭ, bo navukoŭcy nie viedali, jakuju formu prymaje hety białok u «bajavym stanie» ŭ kletkach čałaviečaha cieła i ŭ kryvacioku i ź jakimi inšymi kletkavymi sistemami jon złučajecca i ŭzajemadziejničaje.
Adzinaje, što ŭdałosia vyśvietlić navukoŭcam za apošnija 20 hadoŭ, — toje, što Klotho niejkim čynam źviazany z harmonami ź siamiejstva FGF, jakija adkazvajuć za rost złučalnaj tkanki. Kali vydalić hieny, źviazanyja z Klotho abo hetymi sihnalnymi rečyvami, praciahłaść žyćcia žyvioł rezka padała, što śviedčyła ab sumiesnym charaktary ich dziejańnia.
Dla novaha daśledavańnia navukoŭcy stvaryli trochmiernuju madel hetych białkoŭ, i paśla niekatorych apieracyj vyjaviłasia, što Klotho nie zapavolvaje stareńnie sam pa sabie, hetuju rolu nasamreč vykonvaje inšy białok, FGF23. Hety harmon, jak adznačajuć navukoŭcy, sintezujecca ŭ kaścianym mozhu i raspaŭsiudžvajecca pa ŭsim arhaniźmie, dzie jon złučajecca z Klotho i šeraham inšych malekuł, prymušajučy kletki rehienieravacca.
Vykarystoŭvajučy hetyja źviestki, jak adznačaje bijołah, možna stvaryć malekułu, jakaja budzie aktyvavać malekuły FGF23 hetak ža dobra, jak i Klotho, što dazvolić značna zapavolvać stareńnie.
