18 studzienia litoŭskija ŭłady paviedamili, što praz Kłajpiedski port była pieravieziena rekordnaja kolkaść hruzaŭ. Heta zdaryłasia ŭ pieršuju čarhu za košt biełaruskich kampanij, jakija, niahledziačy na cisk Maskvy, praciahvajuć vykarystoŭvać pieravažna party krain Bałtyi, a nie rasijskija. Chacia biełaruskija ŭłady i abiacajuć pieranakiravać častku hruzaŭ na rasijskija party, naša kraina praciahvaje aryjentavacca na marskija šlachi krain Bałtyi. Belarus Digest raźbirałasia, jak adsutnaść dostupu da mora i palityčnyja hulni susiednich krain padryvajuć suvierenitet Biełarusi.
20 studzienia biełaruski vice-premjer Uładzimir Siamaška pradkazaŭ, što Biełaruś pieranakiruje 1 miljon ton naftapraduktaŭ z bałtyjskich partoŭ na rasijskija. Ale navat kali hety prahnoz ažyćciavicca, takija abjomy pastavak naŭrad ci mohuć kahości ŭrazić, bo heta kropla ŭ mory ŭ paraŭnańni z pastaŭkami praz bałtyjskija party.
Zrazumieła, što Rasija zacikaŭlenaja ŭ tym, kab pieraraźmierkavać transpartnyja patoki biełaruskich naftapraduktaŭ, ale jaje resursy abmiežavanyja, navat kab prymusić Biełaruś pieraaryjentavacca na rasijskija party. Rasijskaja čyhunka kožny hod moža pieravozić nie bolš za 5 miljonaŭ ton biełaruskich naftapraduktaŭ. Nie vyhadna heta i našaj krainie — sabiekošt transparciroŭki adnoj tony naftapraduktaŭ praz bałtyjskija party vahajecca ad 6 da 8 dołaraŭ, u toj čas jak praz rasijskija party košt moža dasiahać 18 dołaraŭ.
Ale častkova dyviersifikavać transpartnyja šlachi Biełaruś usio ž choča, chacia pra poŭnuju admovu ad Kłajpiedy havorka nie idzie. Litva aktyŭna krytykuje Biełaruś za budaŭnictva atamnaj elektrastancyi, tamu razmovy pra mahčymaje źmianšeńnie pastavak naftapraduktaŭ praz Kłajpiedu moža zrabić Litvu bolš zhodlivaj.
Apošnija niekalki hadoŭ Biełaruś pašyrała svaju prysutnaść u litoŭskich i łatvijskich partach. U 2013 hodzie «Biełaruśkalij» vykupiŭ 30% terminała kłajpiedskaha porta. Stała viadoma i pra sakretnyja damoŭlenaści «Naftana» i Ryžskaha porta. Całkam vidavočna, što takaja aktyŭnaść budzie niepakoić Rasiju.
U jakaści alternatyvy Biełaruś sprabavała znajści inšyja varyjanty, pierš za ŭsio party Hdańska i Adesy. Chutčej za ŭsio, hetyja sproby byli pravalnymi. Nie tak daŭno stała viadoma pra zakryćcio biełaruskich konsulstvaŭ u hetych haradach — naŭrad ci heta prosta supadzieńnie.
Takim čynam, Biełaruś zastajecca va ŭraźlivym stanoviščy: u supracoŭnictvie z Polščaj i Ukrainaj u marskich pieravozkach prahresu niama, a pastaŭki praz bałtyjskija party zastajucca niestabilnymi. Biez rehijanalnaj kaapieracyi i dyviersifikacyi handlu biełaruski suvierenitet budzie i dalej znachodzicca va ŭraźlivym stanoviščy.
